Vlorë- Një incident i dhunshëm ka ndodhur pasditen e sotme në Portin e Vlorës, ku dy shtetas janë përfshirë në një konflikt me një punonjës të policisë kufitare.

Ngjarja ka ndodhur rreth orës 16:00, kur dy personat që udhëtonin me një furgon me targa angleze janë refuzuar të kalonin një kontroll të plotë të mjetit nga ana e autoriteteve.

Sipas burimeve të sigurta, dy shtetasit kanë pretenduar se kishin kaluar një kontroll më parë në doganën italiane dhe, për këtë arsye, nuk ishin të gatshëm për t’u kontrolluar nga policia kufitare shqiptare.

Sipas informacioneve të para, gjatë përpjekjeve për të kryer kontrollin, tensionet kanë eskaluar dhe janë shndërruar në një përplasje fizike mes dy shtetasve dhe punonjësit të policisë kufitare. Si pasojë, një efektiv i policisë është lënduar dhe ka kërkuar ndihmë mjekësore, ndërsa është transportuar menjëherë në spitalin e Vlorës për trajtim.

Pas këtij incidenti, Policia e Vlorës ka ndërhyrë dhe ka arrestuar dy shtetasit që përfshiheshin në sherr. Ata janë ndaluar dhe do të përballen me akuzat për kundërshtim të punonjësit të policisë dhe pengim të ushtrimit të detyrës. Autoritetet janë angazhuar për hetimin e ngjarjes dhe për zbardhjen e plotë të saj.

Ky incident ka ngjallur shqetësim në komunitetin e Portit të Vlorës, një zonë ku kalimi i mjeteve me targa të huaja është i zakonshëm për shkak të fluksit të lartë të turistëve dhe tregtisë ndërkombëtare.

Policia kufitare e Vlorës ka theksuar se do të vazhdojë me kontrolle të rrepta për të siguruar rendin dhe sigurinë në port, ndërsa kërkesa për bashkëpunim nga udhëtarët është theksuar edhe një herë.

Një 17-vjeçar nga Shqipëria dhe një tjetër, 18-vjeçar kanë pësuar lëndime në kokë nga një sulm i ashpër dhe janë dërguar në urgjencën e Athinës, ku kanë marrë mjekim.

Të rinjtë, nxënës shkolle, janë sulmuar nga një grup personash me kapuçë në Alimos në orët e para të së shtunës, për pasojë janë dërguar në spital.

Policia greke tha se, ngjarja ka ndodhur rreth orës 03:15, në rrugën “Ionias” pranë sheshit “Karaiskaki”, ku një grup prej rreth 7 personash të maskuar me kapuçë kanë sulmuar të paprovokuar, me shkopinj të improvizuar, një grup tjetër prej 11 studentësh.

Një 17-vjeçar nga Shqipëria dhe një 18-vjeçar kanë pësuar lëndime në kokë nga sulmi fizik.

Hetimet për ngjarjen janë ndërmarrë nga Sektori i Sigurimit të Alimos.

Një kamera sigurie ka regjistruar momentin e sulmit:

Kryetari i Bashkisë së Alimos tha se kjo është një pikë ku takohen katër komuna, Ilioupoli, Argyroupoli, Agios Dimitrios si dhe Alimos dhe ka mundësi që grupe nga zona të ndryshme të jenë një faktor që i krijon këto situata.

Një raketë, që u lëshua nga rebelët jemenas, Huthi, të cilët mbështeten nga Irani, ra në Izraelin qendror mëngjesin e së dielës. Kjo nxiti lëshimin e sirenave për sulme ajrore në aeroportin ndërkombëtar. Izraeli ka lënë të kuptohet se do të përgjigjet ushtarakisht.

Nuk ka raportime për viktima apo për dëme të mëdha materiale, por mediat izraelite kanë publikuar pamje të njerëzve duke nxituar të shkojnë në strehimore për bomba në Aeroportin Ndërkombëtar Ben Gurion. Autoritetet e aeroportit thanë se shumë shpejt rinisën operimin.

Ushtria izraelite kishte bërë disa përpjekje për të rrëzuar raketën. Ushtria tha se duket se raketa është goditur në ajër, por incidenti ende duke u hetuar.

Rebelët Huthi vazhdimisht kanë lëshuar dronë dhe raketa drejt Izraelit që kur ka nisur lufta në Gazë mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në tetor, por pothuajse të gjitha janë rrëzuar mbi Detin e Kuq.

Në korrik, një dron i prodhimit iranian, i lëshuar nga rebelët Huthi, goditi Tel Avivin duke vrarë një person dhe duke plagosur dhjetë të tjerë. Izraeli u përgjigj me një valë sulmesh ajrore në zonat në Jemen që kontrollohen nga rebelët.

Kryeministri izraelit, Benjamin Netanyahu, la të kuptohet se shteti i tij do të përgjigjet edhe ndaj sulmit të fundit, teksa mbajti mbledhjen e ekzekutivit që ai udhëheq.

“Rebelët Huthi duhet ta dinë se çfarë çmimi të lartë do të paguajnë për çdo përpjekje për të na dëmtuar ne”, tha ai.

Zëdhënësi ushtarak i rebelëve jemenas, Yahya Saree, tha se ata lëshuan një raketë balistike, që kishte për shënjestër një “cak ushtarak” në Jafa, që është pjesë e Tel Avivit.

Hashim Sharaf al-Din, zëdhënës i ushtrisë që udhëhiqet nga rebelët, tha se jemenasit do ta festojnë ditëlindjen e Profetit Muhamed, ndërkaq “izraelitët do të jenë në strehimore për bomba”.

Rebelët Huthi vazhdimisht kanë sulmuar anijet tregtare në Detin e Kuq, në shenjë solidariteti me palestinezët në Gazë. Shumica e anijeve të shënjestruara nga ta, nuk kanë lidhje me Izraelin.

Irani mbështet grupe militante në mbarë rajonin e Lindjes së Mesme, përfshirë Hamasin, rebelët Huthi dhe Hezbollahun – grupin libanez të shpallur organizatë terroriste nga SHBA-ja – grup që ka këmbyer zjarr në kufi me Izraelin pothuajse në baza ditore që kur ka nisur lufta në Gazë.

Përveç raketës së lëshuar nga rebelët jemenas, ushtria izraelite tha se rreth 40 raketa u lëshuan nga Libani mëngjesin e së dielës, duke shtuar se shumica e tyre u penguan.

Një burrë është sulmuar me hanxhar në këmbë, në mes të ditës, në Times Square, Nju Jork, SHBA.

Policia tha se ka arrestuar tre persona si të dyshuar për ngjarjen.

Hanxhari është një mjet i mprehtë pune, i përdorur zakonisht për të pastruar shtigjet nëpër xhungël.

Madje hanxharët kanë qenë një instrument gjenocidi pasi ato u përdorën gjerësisht në shfarosjen sistematike të tutsis nga Hutu, ndërsa tani janë një markë e bandave pasi janë një armë shumë e frikshme.

Viktima dyshohet se u godit me thikë në të dyja këmbët nga tre burra jashtë një restoranti McDonald’s. Burri ndodhet në spital në gjendje të qëndrueshme dhe pritet të mbijetojë.

Detektivët thanë sot se shpresojnë se viktima do të konfirmojë identitetin e të dyshuarve. Departamenti i Zjarrfikësve të Nju Jorkut mori një telefonatë për goditjen me thikë në West 45th Street dhe Broadway rreth orës 10:00 të së enjtes.

Zyrtarët thanë se njëri nga të dyshuarit kishte veshur xhinse blu, një këmishë të zezë dhe një çantë shpine. Një i dyshuar i dytë thuhet se kishte veshur një kapuç të zi me një logo të grupit rap dhe një i tretë kishte veshur një kapuç gri dhe xhinse blu.

Megjithëse sulmet dhe therjet me thikë janë shumë të zakonshme në Nju Jork, përdorimi i një thike të krijuar për të vrarë dhe gjymtuar, duket se ka tronditur publikun amerikan.

Një ngjarje e rëndë ka shënuar këtë fundjavë futbollin argjentinas. Një tifoze e skuadrës së Atletiko Rosario Central, ka mbetur e vdekur pasi është qëlluar me gurë nga tifozët kundërshtarë të Njuell’s Old Bojs, pas ndeshjes mes dy skuadrave.about:blank

Sipas mediave lokale, Ivana Paula Garsilazo Bejon, po udhëtonte me motor me partnerin e saj, teksa është vënë nën breshërinë e gurëve nga tifozët e Njuell’s. Ajo është rrëzuar dhe rënia ka qenë fatale, pasi ka mbetur e vdekur, pavarësisht ndihmës së shpejtë që iu dha.

Policia ka bërë të ditur se ka arrestuar dy persona në lidhje me këtë ngjarje të rëndë, teksa është në kërkim një i tretë, nën akuzën e vrasjes.

Kohët e fundit në Argjentinë ka patur një rritje të ndjeshme të akteve të dhunës në aktivitetet sportive dhe kjo ka bërë që të ketë një alarm të përgjithshëm për situatat e krijuara.