Presidentja e Kosovës Vjosa Osmani, gjatë pjesëmarrjes në ceremoninë e rihapjes së katedrales Notre Dame në Paris, ka zhvilluar disa takime të rëndësishme me figura të njohura në skenën botërore.

Osmani ndër të tjera ka takuar edhe ekspertin e teknologjisë dhe miliarderin Elon Musk. “Me Elon Musk në Paris. Një bisedë e madhe për efikasitetin dhe efektivitetin e qeverisë, përpjekjet për të luftuar dezinformimin, si dhe rëndësinë e respektimit gjithmonë të vullnetit të popullit”, shkroi Osmani në një postim në rrjetin social “X”.

Përveç Musk, Osmani ka takuar edhe presidentin e zgjedhur të SHBA-ve Donald Trump, si dhe personalitete të tjera globale, që morën pjesë në event. Rihapja e Notre Dame në Paris që është simbol i trashëgimisë botërore, shënoi një moment të rëndësishëm, pasi ndërtesa u restaurua, pas zjarrit në vitin 2019.

Shefi i diplomacisë Josef Borrell ka zhvilluar një takim informal me liderët e Ballaknit. Në faqen zyrtare të Komisionit Europian thuhet se mbledhja vjetore pasqyron përkushtimin e Bashkimit Evropian ndaj partneritetit me Ballkanin Perëndimor, shtetet anëtare të ardhshme të unionit. Gjithashtu takimi shërben si një rast për shkëmbimin e pikëpamjeve për çështjet me interes të përbashkët, përtej zgjerimit, për çështjet e sigurisë dhe stabilitetit global.

Përfaqësuesi i Lartë i Bashkimit Europian theksoi se Ballkani Perëndimor është pjesë integrale e së ardhmes së Evropës, ndaj anëtarësimi është i arritshëm, me kusht që reformat kyçe të ndiqen me fokus të ri. Më tej Borell nënvizoi rëndësinë e marrëdhënieve të fqinjësisë së mirë të arritura përmes dialogut dhe kompromisit, si hapa thelbësorë drejt integrimit në BE.