Një tentativë për vjedhje në një dyqan ushqimor në Mamurras është parandaluar falë ndërhyrjes së shpejtë të shërbimeve të Policisë së Kurbinit.

Ngjarja ndodhi gjatë natës, kur një 36-vjeçar, i identifikuar si A. M., banues në Mamurras, hyri i maskuar dhe me kapuç në një dyqan, pasi kishte thyer me çekiç xhamin e derës. Menjëherë pas njoftimit, shërbimet e Komisariatit të Policisë Kurbin u nisën në drejtim të adresës dhe arritën ta kapin autorin në flagrancë, ende brenda në dyqan, me mjetin e krimit në dorë.

Gjatë kontrollit, policia sekuestroi çekiçin, maskën dhe kapuçin që u përdorën në tentativën për vjedhje. 36-vjeçari u arrestua në vendngjarje dhe ndaj tij janë ngritur akuzat për “Vjedhje”, mbetur në tentativë, “Sigurimi i mjeteve për vjedhje” dhe “Shkatërrimi i pronës”.

Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.

Athinë, 15 korrik 2025 – Denis Mecolli, 39 vjeç, është arrestuar në Greqi me qëllim ekstradimi në Shqipëri, pasi ishte shpallur në kërkim ndërkombëtar për tentativë vrasjeje të ndodhur në qytetin e Korçës, në muajin shkurt të këtij viti.

Operacioni u realizua në kuadër të aksionit të përbashkët të koduar “The Wanted”, në bashkëpunim mes Policisë së Shtetit Shqiptar dhe autoriteteve greke. Falë shkëmbimit të informacionit mes Interpol Tirana dhe Interpol Athina, u bë i mundur lokalizimi, kapja dhe arrestimi i Mecollit në Greqi.

Sipas njoftimit zyrtar, Gjykata e Shkallës së Parë Korçë, me vendim të datës 9 shkurt 2025, i kishte caktuar Denis Mecollit masën e sigurisë “arrest në burg”, për veprën penale “vrasja me dashje”, mbetur në tentativë.

Ngjarja për të cilën akuzohet ka ndodhur më 4 shkurt 2025, kur ai dyshohet se ka tentuar të vrasë shtetasin E. Sh, 40 vjeç, duke e goditur me mjet prerës (thikë) në një zonë të qytetit të Korçës.

Aktualisht, janë duke u ndjekur procedurat për ekstradimin e Denis Mecollit në Shqipëri, ku ai do të përballet me drejtësinë shqiptare për akuzat që rëndojnë mbi të.

Një shqiptar me nënshtetësi kanadeze është arrestuar në aeroportin e Rinasit në Tiranë, pasi tentoi të trafikonte armë zjarri dhe municion luftarak nga Shqipëria në drejtim të Gjermanisë.

Uniformat blu bëjnë me dije se në kuadër të operacionit policor të koduar “Tranzit” u kap në flagrancë në dalje të Shqipërisë dhe u vu në pranga shtetasi shqiptar me nënshtetësi kanadeze A. Q., banues në Kanada.

Nga kontrolli nëpërmjet skanerit, në bagazhet e këtij shtetasi, u gjet dhe u sekuestrua në cilësinë e provës materiale, 1 armë zjarri pistoletë me municion luftarak

Intensifikimi i kontrolleve nga Policia Kufitare godet një rast të tentativës për të trafikuar armë zjarri, tranzit, nga Shqipëria në Gjermani.

Sekuestrohet 1 armë zjarri pistoletë me municion luftarak.

Njoftimi i policisë:

Arrestohet në flagrancë poseduesi i saj.

Si rezultat i kontrolleve të dedikuara, bazuar në analizën e riskut dhe në informacionet e inteligjencës policore, të intensifikuara për shkak të fluksit në hyrje/dalje, shërbimet e Policisë Kufitare të PKK Rinas, në bashkëpunim me shërbimet e sigurisë në aeroportin e Rinasit, finalizuan operacionin policor të koduar “Tranzit”, në kuadër të të cilit u godit një rast i tentativës për të trafikuar armë zjarri nga Shqipëria në Gjermani.

Gjatë këtij operacioni u kap në flagrancë në dalje të Shqipërisë dhe u vu në pranga shtetasi shqiptar me nënshtetësi kanadeze A. Q., banues në Kanada.

Nga kontrolli nëpërmjet skanerit, në bagazhet e këtij shtetasi, u gjet dhe u sekuestrua në cilësinë e provës materiale, 1 armë zjarri pistoletë me municion luftarak.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprën penale “Trafikimi i armëve dhe i municionit”.

Gramsh, 27 maj 2025 – Një ngjarje e rëndë është regjistruar në qytetin e Gramshit, ku një 38-vjeçar është arrestuar në flagrancë nga Policia pas një denoncimi për dhunë dhe tentativë rrëmbimi.

Sipas njoftimit zyrtar të Drejtorisë Vendore të Policisë Elbasan, shtetasi E. K., 38 vjeç, banues në Gramsh, është vënë në pranga nga specialistët për Hetimin e Krimeve të Komisariatit të Gramshit, pasi një vajzë 18-vjeçare ka denoncuar se ai i është futur pa dëshirë në banesë, e ka goditur me shpullë dhe ka tentuar ta marrë me forcë.

Menjëherë pas kallëzimit, janë kryer verifikime të shpejta dhe ka rezultuar se 38-vjeçari është person me precedent penal në fushën e vjedhjes.

Nën drejtimin e Prokurorisë së Rrethit Gjyqësor Elbasan, po vijon puna për dokumentimin ligjor të plotë të rrethanave të kësaj ngjarjeje. Autoritetet po hetojnë mbi motivet dhe çdo detaj tjetër që lidhet me rastin.

Në vijim të kontrolleve të kryera për lokalizimin dhe kapjen e shtetasve të shpallur në kërkim, specialistët për Hetimin e Krimeve të Komisariatit të Policisë Shkodër, bazuar në informacionet e siguruara nga inteligjenca informative, kanë organizuar dhe finalizuar operacionin policor të koduar “Time”.

Gjatë operacionit u kap dhe u ndalua shtetasin Gentian Mithi 47 vjeç, banues në Shkodër. Në momentin e ndalimit, në rrugë, gjatë kontrollit fizik, atij iu gjet një armë zjarri pistoletë me një krehër me fishekë.

Gentian Mithi akuzohet se më datë 11.05.2024, në lagjen “Salo Halili”, ka qëlluar me armë zjarri, për motive të dobëta, në drejtim të shtetasit J. O., 24 vjeç, i cili u dëmtua në këmbë.

Materialet procedurale i kaluan Prokurorisë, për veprime të mëtejshme.

Drejtoria Vendore e Policisë Durrës ka njoftuar se specialistët e Hetimit të Krimeve në Komisariatin e Policisë Kavajë kanë arrestuar shtetasin F. Xh., 24 vjeç, banues në Durrës, i cili ishte në kërkim. Sipas hetimeve, F. Xh. dyshohet se ka vjedhur kabllo elektrike nga shtyllat e ndriçimit në zonën e Spilles më 31 tetor 2024. Po ashtu, më datë 1 nëntor 2024, ai ka tentuar të vjedhë kabllo të tjera elektrike të shtyllave të ndriçimit në të njëjtën zonë.

Përveç kësaj, Komisariati i Policisë Durrës ka referuar materialet për shtetasin J. D., 34 vjeç, banues në Durrës, i cili dyshohet për veprën penale “Ndërtimi i paligjshëm”. Sipas informacioneve të Policisë, J. D. është nën hetim për aktivitetin e tij të paligjshëm lidhur me ndërtimin e objekteve pa leje, duke shkelur ligjin në fuqi.

Pas hetimeve të kryera, materialet procedurale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Durrës, për të vazhduar me veprimet e mëtejshme ligjore ndaj të dyshuarve. Autoritetet janë duke punuar për të zbardhur tërësisht këto raste dhe për të siguruar që veprat penale të ndëshkohen sipas ligjit.

Shtrim të detyrueshëm në spital psikiatrik ka vendosur trupi gjykues për 42 vjeçarin Altjon Sulejmanaj, autori i dyshuar i vënies së zjarrit në banesën e tij dy ditë më parë në lagjen “15 Tetori” në Fier ku shpëtuan fatmirësisht prindërit e moshuar Shaqir dhe Selside Sulejmanaj.

Seanca ka nisur me 30 minuta vonesë, ku trupi gjykues përbëhej nga gjyqtar Miranda Naka, prokurore Greta Dreni dhe avokat kryesisht Ervis Hajdarmataj

Në sallën e gjyqit gjatë marrjes në pyetje 42 vjeçari Sulejmanaj nuk ka pohuar asgjë.

Pasi ka dëgjuar akuzën dhe mbrojtjen gjyqtaria Miranda Naka ka vendosur masën e shtrimit të detyrueshëm në spital psikiatrik për 42 vjeçarin Altjon Sulejmanaj.

Ngjarja nisi kur 42-vjeçari kërkoi nga babai i tij një shumë të vogël parash, të cilën ky i fundit refuzoi t’ia japë.

Ky refuzim duket se e ka nxitur Sulejmanajn të veprojë me dhunë, duke spërkatur shtëpinë me benzinë dhe duke e vënë zjarrin, pa shfaqur asnjë shenjë pendese për aktin e tij.

Një burrë që, sipas autoriteteve, kaloi 12 orë jashtë fushës së golfit të ish-presidentit amerikan, Donald Trump, përpara se Shërbimi Sekret ta pikaste, u deklarua i pafajshëm ndaj akuzave federale, që përfshijnë akuzën për tentim vrasjeje.

I akuzuari Ryan Wesley Routh u paraqit në gjykatën federale në West Palm Beach disa ditë pasi u paraqit aktakuza me pesë pika, që lidhej me përpjekjen e dytë për të vrarë Trumpin që nga korriku.

Routh hyri në sallën e gjyqit i prangosur dhe i përshëndeti gazetarët e mbledhur për ta ndjekur procesin. Avokatët e tij refuzuan të komentojnë pas seancës.

Përpjekja e pretenduar për vrasje u pengua kur një anëtar i Shërbimit Sekret vuri re tytën e pushkës e Routh që dilte përtej gardhit të fushës së golfit, ku po luante Trump, sipas autoriteteve. Një agjent qëlloi në drejtim të Routhit, i cili u largua me shpejtësi dhe pastaj u arrestua pranë vendit të ngjarjes.

Zyrtarët kanë thënë se Routh nuk qëlloi asnjë plumb dhe nuk e kishte Trump në rrezen e shikimit të tij. Ai la pas një kamerë digjitale, një çantë shpine, një pushkë dhe një qese plastike me ushqime.

Prokurorët kanë thënë se Routh kishte shkruar për planet e tij për ta vrarë Trumpin në një shënim të shkruar me dorë disa muaj para arrestimit të tij më 15 shtator, ku e përshkruante veprimin e tij si një “përpjekje të dështuar për vrasjen e Donald Trump” dhe ofronte 150.000 dollarë për këdo që mund ta “mbaronte punën”.

Ky shënim ishte në një kuti që Routh raportohet se e kishte dorëzuar në shtëpinë e një dëshmitari të paidentifikuar disa muaj para arrestimit të tij.

Seanca e ardhshme në këtë rast do të mbikëqyren nga gjyqtarja federale Aileen Cannon, e cila u emërua në këtë post nga Trump dhe gjithashtu është caktuar të merrej me çështjen penale ku ish-presidenti akuzohet për mbajtjen e dokumenteve të klasifikuara në pronën e tij në Mar-a-Lago.

Cannon ka tërhequr vëmendje për mënyrën e saj të trajtimit të çështjes penale të Trumpit, të cilën e hodhi poshtë në korrik, vendim që tani po apelohet nga ekipi i këshilltarit special Jack Smith.

Arrestimi i Routhit ndodhi dy muaj pasi Trump u qëllua dhe u plagos në vesh gjatë një përpjekje për vrasje në një tubim fushate në Pensilvani. Shërbimi Sekret ka pranuar se ka pasur mangësi në sigurinë para atij sulmi, por ka thënë se masat e sigurisë funksionuan siç duhet për të parandaluar një sulm të mundshëm në Florida.

Fillimisht, Routh u akuzua vetëm për vepra penale që lidheshin me armët, përpara se prokurorët të ngrinin akuza të tjera më serioze. Prokurorët shpesh ngrenë fillimisht akuzat më të lehta për t’u provuar dhe më pas shtojnë akuza më të rënda gjatë zhvillimit të hetimit.

Akuzat e tjera përfshijnë posedimin e paligjshëm të armës, pavarësisht se ai kishte disa dënime penale, duke përfshirë dy akuza për posedim të mallrave të vjedhura në vitin 2002 në Karolinën e Veriut. Ai gjithashtu akuzohet për posedimin e një arme me numrin serik të fshirë, në kundërshtim me ligjin federal./REL

Një 33-vjeçar është arrestuar ditën e sotme në Durrës. Mësohet se i riu është kapur duke hyrë në një banesë për të grabitur. Gjithashtu 33-vjeçari dyshohet dhe si autor i vjedhejes në banesën e një shtetaseje turke banuese në Durrës.

Njoftimi i Policisë:

Durrës/Vijojnë operacionet për parandalimin e vjedhjeve, zbardhjen e atyre të ndodhura më parë, identifkimin dhe kapejn e autorëve. Finalizohet operacioni policor i koduar “Flagranca”. Policia kap në flagrancë në banesën e një shtetasi në tentativë për të vjedhur dhe vë në pranga 33-vjeçarin.

Ky shtetas dyshohet dhe si autor edhe i vjedhejes në banesën e një shtetaseje turke banuese në Durrës. Strukturat e Hetimit të Krimit të Komisariatit të Policisë Durrës si rezultat i veprimeve të shpejta hetimore kanë bërë të mundur zbardhjen e vjedhjes së banesës së një shtetaseje truke, banuese në lagjen nr. 14 Durrës, duke identifikuar autorin e dyshuar.

Shërbimet e Policisë janë vënë në kërkim të autorit, ku gjatë kontrolleve për kapjen e tij, kanë marrë informacion se autori i dyshuar i vjedhjes ishte futur në një banesë tjetër për të vjedhur. Bazuar mbi këto informacione dhe të telefonatës të bërë nga i zoti i banesës, shërbimet e Policisë kanë mbritur në kohë reale në banësën e shtetasit F.A, ku kanë kapur dhe prangosur në flagrancë shtetasin:

A.Sh,. 33 vjeç, banues në lagjen nr. 7, Durrës. Nga verimet e para hetimore rezultoi se ky shtetas në tentativë për të vjedhur ka goditur me grushte shtetasin F.A , por ndërhyrja në kohë e Policisë, bëri të mundur parandalimin e vjedhjes dhe të përshkallzimit të mëtejshëm të këtij rasti.

33-vjeçari më parë dyshohet se ka vjedhur në banesën e një 31-vjeçareje nga Turqia me banim në Durrës, dy aparate celular dhe një sasi parash. Materialet procedurale dhe i kaluan Prokurorisë Pranë Giykatës së Shkallës së parë të Jurdikisionit të Pergjithshëm Durrës për veprime të mëtejshme për veprat penale “Vjedhja” dhe “Vjedhja me dhunë” mbetur në tentative.

Tentoi të fuste në Shqipëri, 500 l naftë të dyshuar të kontrabanduar, vihet në pranga 49-vjeçari.

Sekuestrohet sasia e naftës. Në vijim të punës së intensifikuar të shërbimeve të Policisë Kufitare, gjatë sezonit veror, me qëllim parandalimin dhe goditjen e krimeve në kufij, në PKK Qafë Thanë, në hyrje të RSh-së, u kalua në vijë të dytë, për kontrolle të detajuara, kamioni me drejtues shtetasin R. G.. Në këtë mjet, u gjetën bidonë plastikë të mbushur me 500 litra naftë të pashoqëruar me faturë blerjeje.

Në përfundim të veprimeve procedurale për këtë rast, specialistët për Hetimin e Krimeve të DVKM Korçë bënë arrestimin në flagrancë të shtetasit R. G., 49 vjeç, banues në Elbasan, për veprën penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”. Gjithashtu u sekuestrua në cilësinë e provës materiale, bidonët me naftë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.