Policia parandalon një ngjarje shumë të rëndë kriminale dhe njëkohësisht zbardh një tjetër ngjarje kriminale

Një krim i rëndë ka precipituar në Fier duke përfshirë disa persona, një aferë rrëmbimi, zhdukje qytetarësh dhe bomba me telekomandim në distancë.

E gjitha kjo është bërë objekt pune për policinë e Fierit e cila orët e fundit kreu një megaoperacion të koduar me emrin “Misteri”, raporton noa.al që ju sjell detajet dhe emrat e personave të përfshirë.

Orët e fundit, inteligjenca policore mësoi se disa persona po tentonin të kryenin vrasje me eksploziv ndaj u vunë në ndjekje të të dyshuarve ndërsa ishin duke avancuar me krimin e planifikuar. Ata u kapën ndërsa kishin përgatitur bomba me telekomandë, por nuk konfirmohet se kush ishin personat e synuar për eliminim fizik.

Në kuadër të megaoperacionit policor të koduar “Misteri”, për parandalimin e ngjarjes kriminale, me lëndë plasëse, u arrestua Albi Mecini. Ndërsa u shpallën në kërkim Arafat Manërkolli dhe Ervis Cukali.

Me masë sigurie “Arrest në burg”, nga Gjykata e Sarandës, për veprën penale “Rrëmbimi ose mbajtja peng e personit”, i arrestuari Albi Mecini dhe u shpall në kërkim Sebastian Lataj.

Policia konfirmoi se Albi Mecini u kap me 2 çanta me lëndë plasëse artizanale (rreth 21.3 kilogramë), të montuara për shpërthim në distancë, si dhe me bidona me lëndë djegëse (benzinë), në 2 automjete.

Mecini, 29 vjeç, i cili u kap në flagrancë, ishte i dënuar më parë për dhënie ndihmë 4 shtetasve, për largim nga një burg.

Sakaq janë identifikuar dhe shpallur në kërkim 2 bashkëpunëtorët e 29-vjeçarit, me të cilët ky person (Mecini) do të kryente ngjarjen kriminale, me lëndë plasëse.

Albi Mecini,  29-vjeçari i arrestuar me çanta me lëndë plasëse, si dhe një 25-vjeçar i shpallur në kërkim nga Policia, janë të dyshuar edhe për rrëmbimin e dy personave, Fatmir Sulollari dhe Leonard Theodhorin, kryer në Sarandë, më datë 9 prill 2023.

Si u krye megaoperacioni 

Në aksin rrugor “Mbrostar-Fier”, shërbimet e Forcës se Posaçme Operacionale dhe ato të Forcës së Posaçme “Shqiponja”, të DVP Fier, kapën në flagrancë shtetasin Albi Mecini, 29 vjeç, banues në Kamzë.

Ai u gjet me 2 çanta brenda të cilave ishin 2 pako me rreth 21.3 kilogramë lëndë plasëse artizanale, të montuara me celularë, për shpërthim në distancë. Te dyja çantat u gjetën në afërsi të automjetit të këtij të riu.

Gjithashtu, nga kontrolli i zonës ku ukap Albi Mecini, u gjet një tjetër automjet në brendësi të të cilit ishin 3 bidona me lëndë djegëse benzinë.

Nga veprimet hetimore rezulton se 29-vjeçari Mecini, në bashkëpunim me shtetasit Arafat Manërkolli, 27 vjeç, banues në Dibër dhe Ervis Cukali, 25 vjeç, banues në Tiranë (të cilët u shpallën në kërkim), i kishin siguruar këto kushte dhe mjete, me qëllim kryerjen e një ngjarjeje të rëndë kriminale.

Policia sekuestroi 2 automjete, 2 çanta me rreth 21.3 kg lëndë plasëse artizanale, e montuar me celularë, për shpërthim në distancë, 3 bidonë me benzinë dhe 4 celularë.

Zhdukja e dy qytetarëve

Në prill 2023 u hap procedimi penal i iniciuar nga policia në Vlorë, për zhdukjen e Fatmir Sulollari dhe Leonard Theodhori, zhdukje e raportuar në Policinë e Sarandës, më datë 09.04.2023.

Në vijim të veprimeve hetimore të kryera nga Policia e Fierit, në bashkëpunim me Policinë e Vlorës, rezultoi se Albi Mecini, shtetasi i arrestuar në flagrancë, me çantat me lëndë plasëse, është autor i dyshuar për këtë rast, së bashku me Sebastian Lataj, 25 vjeç, i cili u shpall në kërkim.

Për Albi Mecini dhe Sebastian Lataj, ditën e sotme 30 gusht 2023, Gjykata e Shkallës së Parë e Juridiksionit të Përgjithshëm Sarandë ka caktuar masën e sigurisë “Arrest në burg”, për veprën penale “Rrëmbimi ose mbajtja peng e personit” .

Kush janë dy burrat e zhdukur në Sarandë

Më 9 prill 2023 u zhdukën mistershëm dy burra. Leonard Theodhori, 46 vjeç, njihej edhe si “Koçolja”. Ai ishte dënuar më parë për vepra penale. Për më tepër ka qenë i dyshuar për pjesëmarrje në Masakrën e Qafë-Gjashtës më 1997 kur u vra oficeri i policisë Gjergj Mehmeti.

Më 2003, kur u vra biznesmeni Jaho Bajo, Theodhori ishte në makinën që drejtohej nga Andrea Gjini, i cili i mori jetën biznesmenit.

I dyti i zhdukur është Fatmir Sulovari ose Fatmir Krasniqi, edhe ai 46 vjeç. Ashtu si Theodhori edhe ai ka qenë i dënuar më parë për vepra penale. Ka qenë i dënuar për “armëmbajtje pa leje” dhe “plagosje e lehtë me dashje”. Në prill 2022 ishte arrestuar në Lushnjë pasi në mjetin e tij luksoz u gjetën disa doza marijuane.

Hetimet po vazhdojnë

Strukturat hetimore të Drejtorisë për Hetimin e Krimeve të Rënda në Departamentin e Policisë Kriminale në DPPSH dhe strukturat hetimore të dvp-ve Fier dhe Vlorë, në drejtimin e prokurorive përkatëse, po vijojnë punën për zbardhjen dhe dokumentimin ligjor të të dyja rasteve, kapjen e shtetasve të shpallur në kërkim, si dhe për identifikimin dhe arrestimin e shtetasve të tjerë të implikuar në këto 2 raste. /noa.al