Ushtria e Izraelit i ka kërkuar të gjithë banorëve të qytetit të Gazës që të evakuohen për në jug, pas shtimit të ofensivës në qendër të enklavës.

Për këtë janë hedhur dhe fletpalosje nga ajri ku jepen këto udhëzime: “Të gjithë banorët e qytetit Gaza duhet të largohen nga zona e rrezikshme e luftimit”.
Ushtria izraelit ka përcaktuar dhe rrugë të sigurta. Por Organizata e Kombeve të Bashkuara ka shprehur shqetësim të thellë për urdhrin e evakuimit. Kjo lëvizje e shtetit hebre vjen pas tragjedisë së rëndë në Kan Junis.

Pas sulmit izraelit në një shkollë, të kthyer në strehimore për të zhvendosurit, humbën jetën të paktën 29 persona, shumica gra dhe fëmijë.
Ushtria e Tel Avivit konfirmon se ka hapur një hetim për rastin tragjik, që është dënuar ashpër nga disa vendeve perëndimore, përfshirë Gjermaninë.

“Objektivi ishte një terrorist i lëvizjes islamike palestineze që mori pjesë në sulmin e 7 tetorit”, thuhet në një reagim të ushtrisë.

Ministri i Mbrojtjes i Izraelit, Yoav Gallad u bëri thirrje trupave që të jenë gati për një pushtim “të saktë dhe vdekjeprurës” të Gazës. “Unë jam përgjegjës për mbrojtjen në vend dhe kam qenë përgjegjës për këtë në dy javët e fundit, madje edhe në incidentet e vështira dhe jam përgjegjës për udhëheqjen e luftëtarëve tanë drejt fitores, “u tha Gallad gazetarëve në një terren stërvitor ushtarak pranë kufirit të Gazës.

Ai më pas u bëri thirrje ushtarëve izraelitë që të jenë gati për një pushtim tokësor të Gazës. “Ne do të jemi të saktë dhe vdekjeprurës dhe do të vazhdojmë derisa të përfundojmë misionin”, tha ai.

Kujtohet se pak ditë më parë, përgjegjësinë për dështimet që çuan në masakrat e shtetasve izraelitë dhe të huaj nga Hamasi, në kufirin me Rripin e Gazës, mori kreu i Shërbimit të Sigurisë së Përgjithshme të Izraelit (Shin Bet), Ronan Barr në një letër drejtuar punonjësve të Shërbimit.

Në të, Barr tha se mungesa e paralajmërimit për një sulm të Hamasit është një çështje shqetësuese për të dhe për Shin Bet. “Megjithëse një sërë veprimesh që u ndërmorëm, për fat të keq të shtunën nuk ishim në gjendje të krijonim një paralajmërim të mjaftueshëm që të parandalonte sulmin. Si person në krye të organizatës – përgjegjësia për këtë e kam mua” , ishte qëndrimi i tij fillestar.

Më pas, ai ka theksuar se “do të ketë kohë për hetime. Tani po luftojmë. Humbëm dhjetë nga njerëzit tanë më të mirë, shumë prej nesh u plagosën, ushtarët humbën të afërmit e tyre. Histori të panumërta heroizmi”.

Sipas tij, “që nga dita e parë e luftimeve ne krijuam një formacion të posaçëm, në bashkëpunim me IDF, për të gjetur, identifikuar dhe rikuperuar të rrëmbyerit dhe të zhdukurit”.

Në letrën e tij, Barr shtoi se “të gjithë punonjësit e organizatës mbërritën në njësi, hapën zyra private, krijuan ekipe speciale. Të gjithë ata që mbanin armë zbritën për të luftuar” , ndërsa theksoi se “jemi në luftë, jo në një betejë të thjeshtë. Një luftë përfundon me një vendim dhe një ndryshim shteti. Nuk ka afat kohor. Do të shkojmë deri në fund”.