Policia Kufitare në Rinas ka finalizuar një tjetër goditje ndaj trafikimit të paligjshëm të armëve. Gjatë kontrolleve të shtuara për shkak të fluksit të udhëtarëve, u arrestua në flagrancë shtetasi A.Q., me origjinë shqiptare dhe nënshtetësi kanadeze, teksa tentonte të kalonte në Gjermani me një armë zjarri të fshehur në bagazh.

Operacioni i koduar “Tranzit”, i zhvilluar nga shërbimet e Policisë Kufitare në bashkëpunim me strukturat e sigurisë së aeroportit, u bazua në analiza të riskut dhe të dhëna të inteligjencës policore.

Gjatë kontrollit me skaner në dalje të Shqipërisë, u zbulua një pistoletë me municion luftarak në valixhen e A.Q., i cili u arrestua menjëherë.

Arma dhe municioni u sekuestruan në cilësinë e provës materiale, ndërsa materialet iu referuan Prokurorisë së Tiranës për veprime të mëtejshme, nën akuzën për “Trafikim armësh dhe municionesh”. /noa.al

Policia italiane zbardhi detaje nga operacioni më i fundit i arrestimit të një shqiptari në Piza, me një ngarkesë 21 kg kokainë të fshehur në depon e shtëpisë dhe arsenal armatimi gati për “luftë”.

Karabinierët e kompanisë Firence Oltrarno, me mbështetjen e forcave të Pizës në Firence publikuan edhe foto nga ky aksion, ku ra në sy detaji se pakot e drogës ishin të stampuara me markën “CR7”, të futbollistit portugez Cristiano Ronaldo.

Aksioni u krye në apartamentin e shqiptarit, në zonën e Pisano, në Calambrone. Karabinierët dyshonin për lëvizjet e pazakonta të makinës së përdorur nga i dyshuari, të cilat, pas një sërë operacionesh vëzhgimi, i lejuan ata të identifikonin depon e vërtetë të drogës.

Droga ishte e ndarë në 21 pako një kilogramëshe. U gjetën dhe sekuestruan një armë automatike “Kallashnikov”, një pistoletë, disa telefona, materiale paketimi për fishekët dhe dozat e drogës, informon media italiane.

Droga vlerësohet me një çmim prej të paktën 600 mijë eurosh në tregun e shumicës, por që fitimet trefishoheshin pas prerjes së saj

Politikani 27-vjeçar shqiptar, Amarildo Vllazeria, ka rënë në prangat e policisë belge pas një operacioni anti-drogë, të iniciuar nga zbulimi i bisedave në “Sky ECC”.

Vllazeria, i cili rezulton të jetë ish-Kryetari i Komunës Mortsel në Belgjikë, u arrestua si pjesë e një hetimi të nisur pas mesazheve të hakuara nga platforma famëkeqe “Sky ECC”. Banda e shënjestruar mësohet se është përfshirë në import dhe eksport të drogës si dhe transportin e tyre në periudhën 2020-2021.

Një kontroll shtëpie është bërë edhe pranë qytetit Mortsel. Ish-kryetari nuk u rizgjodh këtë mandat legjislativ, por do të bënte betimin si këshilltar bashkiak të martën në mbrëmje për disa muaj, duke zëvendësuar një koleg partiak. Kjo nuk ndodhi për shkak të arrestimit.

“Të tre personat e arrestuar, janë anëtarë të një organizate kriminale të përfshirë në importin dhe tranzitin e kokainës përmes portit të Antwerpit”, konkludoi policia nga mesazhet e deshifruara të bisedës. Ata u arrestuan pasi policia kreu pesë kontrolle në shtëpi. Gjithashtu janë sekuestruar mallra të ndryshme luksi, telefona dhe një shumë prej 9 mijë eurosh. Bashkia e Mortsel u kontrollua gjithashtu.

Amarildo Vllazeria është këshilltar bashkiak që nga viti 2018 dhe në tetor 2023 u bë kryetar komune në Mortsel. Ai ishte gjithashtu kryetar i komitetit special të shërbimeve sociale në atë kohë dhe ishte anëtar i këshillit të policisë.

Policia e Vlorës ka finalizuar operacionin e koduar “Transnacional”.

Në pranga ka rënë një i ri ukrainas me inicialet O.Sh., i cili dyshohet se trafikonte shtetas të huaj, kryesisht nga Ukraina në Shqipëri, për punë të kundërligjshme.

Njoftim i policisë:
Vijon operacioni policor i koduar “TRANSNACIONAL”. Kapet dhe ndalohet një tjetër shtetas, në kuadër të këtij operacioni.

Strukturat e Hetimit të Krimit në DVP Vlorë, në bashkëpunim me Prokurorinë pranë Gjykatës së Shkallës së Parë Vlorë, kanë finalizuar me sukses një tjetër fazë të operacionit policor “TRANSNACIONAL”, i cili ka për qëllim goditjen e një rrjeti që trafikojnë qenie njerëzore dhe i shfrytëzojnë ato për veprimtari të paligjshme, ka vijuar me kapjen dhe ndalimin e një tjetër shtetasi të përfshirë në këtë aktivitet kriminal.

Si rezultat i këtij operacioni, u bë e mundur kapja dhe ndalimi me iniciativë i shtetasit të huaj O. K., 24 vjeç, banues në qytetin Sumskaja, Ukrainë.

Pas verifikimeve të kryera, rezultoi se ky shtetas, në bashkëpunim me 4 shtetas të tjerë, të arrestuar më herët në kuadër të operacionit “TRANSNACIONAL,” ka trafikuar shtetas nga vende të ndryshme të Europës, kryesisht shtetas nga Ukraina, drejt Shqipërisë, me qëllim shfrytëzimin e tyre për punë të kundërligjshme.

Materialet procedurale u referuan Prokurorisë për veprime të mëtejshme.

Një 22-vjeçar shqiptar është arrestuar nga autoritetet belge.

Sipas mediave të huaja, i riu është kapur gjatë transportit të lëndëve narkotike, kryesisht kokainë.

Ishte ekipi i patrullimit që gjeti një automjet të dyshimtë në Koningin Astridlaan, cili ishte kapur nga rrjeti i kamerave ANPR më herët gjatë ditës.

Ata ndoqën automjetin deri në Brusselsesteenëeg, kur shoferi u identifikua si një person i shpallur më herët në kërkim për trafikim të lëndëve narkotike.

22-vjecari shqiptar, në pamundësi për t’u arratisur, u vu në pranga në Europalaan nga policia belge.

 “Gjatë ecjes, nga automjeti u hodh një çantë, e cila u gjet nga policia. Në çanta kishte pako, gjithsej 4 kg kokainë, të cilat u sekuestruan”, tha zëdhënësja e policisë Elke Wauters.

Një 33-vjeçar i shpallur në kërkim në kuadër të operacionit ‘Luxury cars’ është ndaluar nga policia në Portin e Durrësit.

Mësohet se ai ka bashkëpunuar me 2 shtetasit e proceduar penalisht ditën e premte, për trafikimin në Shqipëri të 2 automjeteve të vjedhura në Itali, me vlerë rreth 280 000 euro, duke iu bërë ndryshime në elementet identifikuese dhe duke i pajisur këto automjete me dokumente false, me qëllim shitjen në vendin tonë.

Njoftimi i Policisë:

I shpallur në kërkim në kuadër të operacionit policor “Luxury cars”, të zhvilluar ditën e djeshme nga Seksioni për Hetimin e Trafiqeve në DVP Vlorë kapet dhe ndalohet në Portin e Durrësit 33-vjeçari.

Në vijim të veprimeve në kuadër të operacionit policor “Luxury cars”, për identifikimin dhe kapjen e shtetasve të tjerë të përfshirë në veprimtarinë kriminale të trafikimit në Shqipëri të automjeteve të vjedhura, specialistët e Seksionit për Hetimin e Trafiqeve të Paligjshme të DVP Vlorë, në bashkëpunim me shërbimet e Policisë Kufitare në Portin e Durrësit, ndaluan shtetasin 33 vjeç, banues në Lezhë.

Ky shtetas ishte shpallur në kërkim, pasi dyshohet se ka bashkëpunuar me 2 shtetasit e proceduar penalisht ditën e djeshme, në kuadër të operacionit “Luxury cars”, për trafikimin në Shqipëri të 2 automjeteve të vjedhura në Itali, me vlerë rreth 280 000 euro, duke iu bërë ndryshime në elementet identifikuese dhe duke i pajisur këto automjete me dokumente false, me qëllim shitjen në vendin tonë.

Materialet procedurale i kaluan Prokurorisë, për veprime të mëtejshme

Një shtetas shqiptar është arrestuar nga policia në Hungari, teksa ka tentuar të kalojë kufirin me një sasi të madhe armësh dhe municione.

Një zëdhënës nga prokuroria e Budapestit tha se shqiptari, identiteti i të cilit nuk është bërë i ditur, po lëvizte me një makinë tip “Mitsubishi” nga Serbia në drejtim të Hungarisë.

Brenda makinës u gjetën 9 automatikë, 3 pistoleta dhe 2700 fishekë.

Ai po qëndron aktualisht në paraburgim ndërsa janë ngritur akuzat e trafikimit të armëve.