Politikanët dhe diplomatët evropianë janë përgatitur tashmë për ndryshimin e marrëdhënieve me Shtetet e Bashkuara në rast se Donald Trump rikthehet në presidencë.

Tani që kandidati republikan ka zgjedhur senatorin e Ohajos, J D Vance si zëvendësin e tij, dallimet mes Uashingtonit dhe Brukselit duken edhe më të zymta sidomos sa i takon Ukrainës, sigurisë dhe marrëdhënieve tregtare.

Një kritik i zëshëm i ndihmës amerikane për Ukrainën, Vance deklaroi këtë vit në Konferencën e Sigurisë në Mynih se Evropa duhet të zgjohet dhe të kuptojë se Shtetet e Bashkuara duhet të fokusohen tek Azia Lindore. Një diplomat evropian deklaroi në kushte anonimati se pas 4-vjeçarit të parë të Donald Trump askush nuk është më naiv.

“Ne e dimë se ç’do të thotë nëse Trump kthehet për një mandat të dytë, pavarësisht kandidatit të zgjedhur si zëvendës të tij”,– deklaroi diplomati.

Duke e portretizuar Bashkimin Evropian si një varkë me vela që bëhet gati për stuhinë, diplomati shtoi se me çfarëdo që do të përballet, Unioni do ta ketë të vështirë. Shtetet e Bashkuara mbeten për momentin aleati më i madh i Ukrainës në përballjen me Rusinë. Presidenti Volodymyr Zelensky deklaroi më herët se nuk i trembej një rizgjedhjeje të Donald Trump.

“Nuk kam frikë nga rizgjedhja e tij, ne do të punojmë së bashku”,– deklaroi ai.