TIRANA- Fiks Fare denoncoi për të disatën herë skandalin që ndodh në Morgun e Tiranës, ku vendi ku mbahen kufomat është jashtë çdo standardi. Fiksi siguroi foto e pamje nga brenda Morgut ku shihen trupa të dekompozuar dhe që kishin zënë krimba. Trupat mbaheshin jashtë frigoriferëve, pasi këta të fundit nuk punonin. Kjo gjë kishte sjell një kolaps të situatës, ku trupat e lënë jashtë frigoriferëve kishin filluar të dekompozoheshin dhe kishin zënë krimba.

Në Fiks Fare u ankua një qytetar i cili kishte ardhur nga Italia për të bërë identifikimin e një kufome , por që ishte hasur me një ngjarje horror. Kufoma që ai ka parë për ta identifikuar ishte gjysmë e dekompozuar dhe e mbushur me krimba. Foto të cilat i vuri në dispozicion të Fiksit. Gjithashtu Fiksi siguroi edhe disa foto të tjera që vërtetojnë situatën alarmante në Morgun e Tiranës. Një kufomë gjendej e shtrire në pllaka, ndërkohë që disa të tjera të mbështjella ishin lënë jashtë frigoriferëve mbi barela. Dekompozimi i kufomave që nuk dihet se prej sa ditësh janë në atë gjendje kishte sjell një erë të rëndë në të gjithë Morgun.

Gazetarët e Fiksit arritën të futen brenda Morgut duke sjell pamjet me anë të kamerës dhe situata ishte po e njëjta siç denoncuesit e kishin përshkruar. Fiksi mësoi se në Morg gjendeshin 29 trupa ndërkohë që kapaciteti është për 17 trupa. Morgu ka tre frigorifer, ku dy janë me kapacitet 8 vende total dhe një frigorifer 9 vende. Nga tre frigoriferët vetëm njëri punonte me kapacitet 4 vende, tjetri me po të njëjtin kapacitet dhe ai 9 vende ishin të prishur.

Fiksi gjatë hyrjes në Morg hasi me drejtorin Institutit të Mjekësisë Ligjore, z. Bledar Xhemali të cilin e pyeti rreth situatës së krijuar. Ai fillimisht mohoi gjithçka duke kërkuar prova. Gazetarët e Fiksit i treguan fotot dhe i kërkuan se pse kufomat kanë zënë krimba. Ai në përballje me gazetarët tha se ajo ishte faza e trupit kur fillon dekompozimi , por jo krimba. Për sa i përket këmbënguljes së gazetarëve për të marrë përgjigje, drejtori IML-së shmanget duke u larguar.

Menjëherë pas hyrjes së Fiks Fare në Morg dy ditë më vonë institucioni filloi pastrimin dhe zhvendosjen e kufomave. U zhvendosën 11 prej tyre përkatësisht 5 kufoma në Morgun Fier dhe 6 në Morgun Elbasan. Pamje të cilat Fiks Fare i solli mbrëmjen e së martës. Gjithashtu u mësua nga gazetarët e Fiksit se u vu në punë edhe njëri prej frigoriferëve të prishur, ai me kapacitet 4 vende. Pra aktualisht në Morg janë 18 kufoma të sistemuara në dy frigorifer me kapacitet 8 vende në total.

Për të gjetur një zgjidhje për problemet e vazhdueshme në këtë morg, në muajin shtator të vitit 2024, Instituti i Mjekësisë Ligjore ka hapur një tender me objekt “ndërtimi i dhomës frigoriferike kufoma mbajtëse”. Fondi i akorduar ka qenë 99.8 milionë lekë, ose rreth 1 milionë euro.

Një muaj më vonë, në tetor 2024, IML-ja, shpalli fituesit e këtij tenderi, firmat 2T dhe Alges Konstruksion, të cilat kanë 12 muaj kohë për t’a përfunduar. Dy firmat ishin të vetme në garë dhe ofruan 98 milionë lekë. Ndërkohë, në dokumentet shoqëruese është edhe një përshkrim i gjendjes ekzistuese, ku shkruhet se Instituti i Mjekësisë Ligjore bën ekzaminimet e detajuar të viktimave që mund të jenë të llojeve të ndryshme, aksidente, sëmundje, vrasje apo edhe të papritura.

Ky ekzaminim, shkruhet në dokumente, do të bëhet në pjesën mbrapa në dhomën e Morgut, i cili ka kapacitet për 3 kufoma, 3 shtretër. Ngjitur me dhomën e morgut, ndodhet edhe dhoma frigoriferike, e cila nuk ka kapacitetin e duhur për pritjen e shumë kufomave. Ka shumë raste, vijon dokumenti, ku trupat duhet të rrinë me muaj të tërë për shkak se nuk interesohet askush, apo nuk janë të identifikuar.

Më tej, IML-ja shkruan se qëllimi i projektit është rritja e kapaciteteve. Strukturës ekzistuese do t’i bëhet ndërtimi i një shtese, dhomë frigoriferike kufoma mbajtëse, me Kapacitet për 100 kufoma, 25 njësi me 4 poste frigoriferike. Pra deri në përfundim të dhomës së re frigoriferike IML-ja nuk po bën asnjë investim tjetër duke krijuar këtë situatë të pazakontë./ Top Channel

TRAGJEDI NË AJËR: Rrëzimi i avionit të Air India pranë Ahmedabadit lë të paktën 30 të vdekur – aeroplani godet konviktin e mjekëve

Ahmedabad, Indi – Të paktën 30 persona kanë humbur jetën dhe dhjetëra të tjerë janë plagosur kur një avion i linjës Air India, me 242 pasagjerë në bord, është rrëzuar menjëherë pas ngritjes nga aeroporti i Ahmedabadit, duke goditur një kompleks banimi të përdorur si konvikt për mjekët.

Ngjarja ndodhi gjatë fluturimit AI171 me destinacion Londër Gatwick, që mbante në bord 169 shtetas indianë, 53 britanikë, një kanadez dhe shtatë portugezë. Sipas të dhënave të Flightradar24, avioni humbi sinjalin vetëm disa sekonda pas ngritjes, në një lartësi prej 190 metrash.

Pamjet dramatike nga vendi i ngjarjes tregojnë re tymi të zi që ngrihen mbi ndërtesat pranë aeroportit, raporton noa.al.

Sipas policisë lokale, avioni është përplasur me rezidencën e mjekëve – një bllok apartamentesh shumëkatëshe ku jetojnë mjekë dhe studentë të mjekësisë. Trupat e djegur janë parë të shpërndarë në zonë, ndërsa zjarrfikësit kanë vijuar për orë të tëra përpjekjet për shuarjen e flakëve dhe shpëtimin e personave të bllokuar.

Nëna e një studenti dëshmon momentin tronditës: “Djali im sapo kishte hyrë në dhomën e tij kur dëgjoi zhurmën. Më tha: ‘Po na vjen një avion’. Pastaj kërceu nga kati i dytë për të shpëtuar. Fatmirësisht është jashtë rrezikut për jetën, ndonëse i lënduar.”

Operacion i madh shpëtimi dhe panik në spitale

Zyrtarët e zjarrfikësve, policia dhe ekipet e emergjencës kanë reaguar brenda pak minutash. Trupat vijojnë të nxirren nga rrënojat. Shumë të afërm të pasagjerëve janë mbledhur pranë spitaleve në Ahmedabad. “Brenda një ore nga nisja mora lajmin se avioni ishte rrëzuar. Erdha menjëherë këtu”, deklaron Poonam Patel, i cili pret lajme për një familjare që ishte në fluturim.

Darshna Vaghela, një politikane vendase, tregon për gazetarët se dëmet janë të mëdha: “Isha në zyrën time aty pranë kur dëgjova një krismë të fortë. Pamjet ishin të tmerrshme. Arritëm të shpëtojmë shumë mjekë nga apartamentet e tyre.”

Boeing në qendër të vëmendjes – rrëzohet për herë të parë një 787 Dreamliner

Avioni i rrëzuar ishte një Boeing 787-8 Dreamliner, një model i avancuar që kishte kryer miliona orë fluturimi pa incidente të rënda. Ky është rasti i parë ku një Dreamliner rrëzohet në këtë mënyrë. Vetëm gjashtë javë më parë, Boeing festoi faktin se ky model kishte transportuar mbi 1 miliard pasagjerë.

Kompania ka reaguar përmes një deklarate të shkurtër: “Jemi në dijeni të raporteve fillestare dhe po punojmë për të mbledhur më shumë informacion.”

Reagime ndërkombëtare – Britania e Madhe e shqetësuar për shtetasit e saj

Kryeministri britanik Keir Starmer shprehu dhimbjen e tij për ngjarjen tragjike: “Skenat që po shfaqen nga një avion që transportonte shumë shtetas britanikë janë shkatërruese. Mendimet e mia janë me pasagjerët dhe familjet e tyre.”

Hetimet sapo kanë nisur

Policia dhe autoritetet ajrore indiane kanë nisur hetimet për të zbuluar shkakun e rrëzimit. Dyshimet paraprake lidhen me një defekt teknik ose gabim njerëzor, por asgjë nuk është konfirmuar ende zyrtarisht.

Situata mbetet në zhvillim. Autoritetet kanë ngritur një linjë emergjente për familjarët e pasagjerëve dhe po kërkojnë gjak në spitale për të plagosurit.

—

[Ky lajm do të përditësohet me informacion të ri sapo të konfirmohet.]