Prokuroria e Tiranës ka kërkuar ekspertim të dytë të rezultateve të autopsisë për shkaqet e vdekjes së 3-vjeçarit Brian Spahiu, i cili humbi jetën në fillim të muajit tetor pas një ndërhyrje kirurgjikale në 14 dhëmbë në klinikën e mjekut Roland Xhaxho.

Prokuroria e Tiranës ka kërkuar ekspertim të dytë të rezultateve të autopsisë për shkaqet e vdekjes së 3-vjeçarit Brian Spahiu, i cili humbi jetën në fillim të muajit tetor pas një ndërhyrje kirurgjikale në 14 dhëmbë në klinikën e mjekut Roland Xhaxho.

Report Tv mëson se organi i akuzës ka administruar pak kohë më parë autopsinë nga Instituti i Mjekësisë Ligjore, rezultatet e të cilave nuk janë bërë publike edhe me insistimin e medias.

Mbetet e paqartë pse akuza ka kërkuar riekspertim, por burimet thonë se rezultatet e reja pritet të dalin në fillim të javës së ardhshme. Ndërkohë, prokuroria vijon hetimet për rastin.

Me urdhër të Prokurorisë së Tiranës, policia ka sekuestruar të premten DVR-në e klinikës ‘Splendent’ ku u krye ndërhyrja ndaj 3-vjeçarit Brian Spahiu, i cili humbi jetën pas ndërhyrjes kirurgjikale.

Mësohet se mjeku Roland Xhaxho ka pretenduar se në ambientet e brendshme nuk ka pamje të kohëve të fundit me argumentin e kryerjes së disa punimeve.

Megjithatë, hetuesit kanë marrë të plota materialet dhe pritet që në ditët në vijim të këqyren me detaje, edhe mbi dyshimet se mund të jetë ndërhyrë për fshirjen e ndonjë materiali filmik.

Po ashtu, janë sekuestruar edhe disa kompjuterë dhe dokumentacione që kanë lidhje me ndërhyrjen e fëmijës 3 vjeç.

3-vjeçari Brian Spahiu vdiq në reanimacionin e pediatrisë më 1 tetor, 3 ditë pas kreu ndërhyrjen kirurgjikale te dentistja Ina Xhaxho për mbushjen e 14 dhëmbëve. Ka qenë babai i saj, Roland Xhaxho që ka kryer anestezinë dhe të dy janë nën hetim, ndërsa Prokuroria e Tiranës po vijon hetimet. Familjarët akuzojnë mjekun se i ka dhënë dozë të lartë anestezie, ndërsa thonë se djalin e kanë marrë në gjendje të rëndë nga klinika.

Urdhri i Stomatologëve ka reaguar për vdekjen e vogëlushit 3-vjeçar, pas ndërhyrjes për rregullimin e dhëmbëve në një klinikë private në Tiranë.

 Në një postim në faqen zyrtare, Urdhri i Stomatologëve bën me dije se sot ata e kanë shpallur ditë zie kombëtare, ndërsa theksohet se pavarësisht përpjekjeve të shumta nuk kanë mundur dot të lidhen me doktor Roland Xhaxhon dhe klinikën e tij.

Urdhri i Stomatologëve i ka bërë gjithashtu apel Ministrisë së Shëndetësisë dhe Prokurorisë që të dalin sa më parë në një prononcim për publikun.

Reagimi zyrtar i Urdhrit të Stomatologëve të Shqipërisë për mediat dhe opinionin publik: Urdhri i Stomatologëve të Shqipërisë i shpreh ngushëllime familjes dhe të afërmëve të vogëlushit të ndjerë, Brian Spahiu!

 Stomatologjia shqiptare sot ka shpallur ditë zie dhe lutjesh  për Brianin e vogël. Opinioni paraprak i USSH është se: – Duhet një prononcim i stomatologut që ka kryer mjekimin e dhëmbëve të vogëlushit;

– Të intervistohet nga gazetarët dhe mediat stomatologu kompetent, i cili ka percaktuar protokollin e mjekimit të vogëlushit të ndjerë dhe ka kryer mjekimin dentar;

– Ministria e Shëndetësisë dhe Prokuroria duhet të prononcohen publikisht, në një kohë sa më të shpejtë të mundëshme.

Urdhri i Stomatologëve të Shqipërisë nuk ka asnjë informacion nga stomatologu ose klinika përgjegjëse për trajtimin e vogëlushit edhe pasi janë bërë përpjekje maksimale për t’i kontaktuar(askush nuk  përgjigjet në numrat e tyre të telefonit).