Policia e Ekuadorit konfirmoi të premten vdekjen e një burri që po hetohet nga Prokuroria në një komplot që përfshin kunatin e presidentit të vendit. Viktima sipas hetimeve ishte operatori i dyshuar i një grupi kriminal me origjinë shqiptare me bazë në Ekuador dhe emri i tij figuron edhe në çështjen e përvetësimit për të cilin Presidenti Guillermo Lasso do të shkarkohet.

Si policia ashtu edhe ministri i Brendshëm ekuadorian, Juan Zapata, konfirmuan zbulimin dhe identitetin e viktimës në Twitter: Rubén Cherres. Bashkë me të ishin edhe tre viktima të tjera emrat e të cilëve ende nuk janë bërë të ditur. Trupat e tyre u gjetën në qytetin bregdetar të Punta Blanca, rreth 100 kilometra nga Guayaquil.

Prokuroria kishte rihapur hetimin ndaj viktimës në muajin shkurt, pas disa zbulimeve gazetareske ku u raportua se Cherres kishte kontakte me kunatin e presidentit ekuadorian dhe, përveç kësaj, kishte qenë objekt i përgjimit nga policia mes Qershor 2021 dhe Janar 2022 për lidhjet e tij me mafien shqiptare me bazë në Ekuador.

Si rezultat i atij vëzhgimi, policia përgatiti një kallëzim por hetimi u mbyll me kërkesë të Prokurorisë dhe me urdhër të gjyqtarit. Cherres ishte i lidhur me Dritan Gjikën, një shtetas shqiptar me banim në Guayaquil. Që nga viti 2014, të dy kanë aksione të përbashkëta të 12 kompanive, shumica e lidhur me biznesin e pasurive të paluajtshme, sipas të dhënave. Tetë nga këto kompani u krijuan në një ditë të vetme, më 17 qershor 2021. Të gjitha këto janë të vendosura në një zyrë në ndërtesën Sky, që ndodhet në veri të Guayaquil.