Një aksident rrugor ka ndodhur mëngjesin e kësaj të dielës në autostradën Milot-Mamurras, në afërsi të mbikalimit të Patokut.

Një autoveturë është përplasur me një autobus, por fatmirësisht pasagjerët e këtij të fundit nuk kanë marrë lëndime. Të plagosur kanë mbetur dy persona që ndodheshin në autoveturë, të cilët janë dërguar me urgjencë për ndihmë mjekësore në Spitalin e Traumës në Tiranë.

Ndërkohë policia, e cila mbërriti menjëherë në vendin e ngjarjes, nisi hetimet për zbardhjen e shkaqeve dhe rrethanave të këtij aksidenti.

Një person i moshuar ka tentuar të vetëvritet, ditën e sotme në fshatin Dukat të Vlorës. Policia thotë se 76-vjeçari është nisur me urgjencë drejt spitalit të Traumës në Tiranë.

“Sot, në fshatin Dukat Fshat, në banesën e tij, ka tentuar të vetëdigjet me benzinë shtetasi A. L., 76 vjeç, i cili do të transportohet drejt spitalit të Tiranës, për mjekim të specializuar.

Grupi hetimor po kryen veprimet për zbardhjen e rrethanave të ngjarjes dhe dokumentimin e plotë të saj”, njofton policia.

Një person është plagosur me armë zjarri në fshatin Bolene të Vlorës.

Sipas informacioneve paraprake, i plagosuri është një bari (çoban), i cili dyshohet se është vetëplagosur me një armë gjahu, tip çifte.

Ngjarja ka ndodhur në stanet ku ai ushtronte aktivitetin e tij si bari, ndërsa ende nuk dihen rrethanat e plota të incidentit.

Menjëherë pas plagosjes, ai është transportuar me urgjencë në spitalin e Vlorës, ku ndodhet nën kujdesin e mjekëve.

Burime nga bluzat e bardha bëjnë me dije se i plagosuri ndodhet jashtë rrezikut për jetën.

Policia ka nisur hetimet për të zbardhur rrethanat e ngjarjes dhe për të sqaruar nëse kemi të bëjmë me vetëplagosje apo rrethana të tjera.

Charlotte Lazzari ka kaluar një moment shumë të frikshëm këtë fundjavë. Mësuesja 32-vjeçare e jogës, e cila është edhe bashkëshortja e balerinit dhe koreografit të njohur Kledi Kadiu, ka përjetuar një sëmundje të papritur që e detyroi të kërkonte ndihmën e urgjencës të shtunën që kaloi.

Ajo ka ndarë me ndjekësit një histori të emocionuar në Instagram, ku shfaqet e shtrirë në shtrat spitali dhe me një serum në krah. Në këtë postim, Charlotte ka ndarë emocionet dhe përvojën e saj, duke treguar se trupi i saj e paralajmëroi për lodhjen, por ajo nuk e mori seriozisht këtë sinjal.

“Trupi im më bëri të frikësohem, por ndoshta ka të drejtë, sepse thjesht më tregonte se kishte nevojë për pushim”, ka shkruar Charlotte, duke theksuar se kishte injoruar sinjalet e lodhjes dhe streset e grumbulluara. Ajo shtoi se ky incident i ka kujtuar rëndësinë e dëgjimit të trupit dhe se tani po ndihet më mirë.

Pas disa ditësh trajtim në spital, Charlotte është rikuperuar dhe ka mundur të kthehet në shtëpi, në momentin më të duhur për të festuar ditëlindjen e vajzës së saj Lea, e cila mbushi 9 vjeç.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Një grua ka pësuar lëndime të rënda pasi është goditur me thikë nga një person në departamentin e aksidenteve dhe urgjencës ku po punonte në zonën e Manchester, Londër.

E plagosura, një infermiere rreth 50-vjeçe, u sulmua në Spitalin Royal Oldham në Greater Manchester, ku tani po trajtohet.

Oficerët u thirrën në orën 23:30 të së shtunës dhe arrestuan një 37-vjeçar, të dyshuar nën akuzën për tentativë vrasje, ka deklaruar Policia e Mançesterit.

Detektivët kanë raportuar se nuk ka të tjerë persona të dyshuar të përfshirë në këtë ngjarje dhe se nuk shfaqet një rrezik apo kërcënim për publikun e gjerë.

“Mendimet tona janë edhe me kolegët dhe pacientët që ishin aty në momentin e incidentit dhe për të cilët kjo ka qenë shqetësuese dhe e frikshme”. Të gjitha shërbimet në Spitalin Royal Oldham mbeten të hapura”, tha shefja e infiermerisë në North Care Alliance NHS Foundation Trust.

Jim McMahon, deputeti laburist për zonën, e përshkroi sulmin si diçka “të pakuptimtë”.

“Të gjithë jemi të tronditur nga sulmi i pakuptimtë ndaj një infermiere në departamentin A&E të Spitalit Royal Oldham. Mendimet tona janë me infermieren, familjen dhe miqtë, pasi dëshirojmë një shërim të plotë”, postoi ai në Facebook.

Rreshteri Craig Roters ka theksuar se komuniteti lokal mund të shohë një “rritje të pranisë së policisë” ndërkohë që kryhen hetimet.

Ish-presidenti i Shteteve të Bashkuara të Amerikës, Donald Trump, ndali tubimin e tij në Michigan për shkak të një urgjence mjekësore. Kjo ndodhi pasi ai filloi fjalimet e tij të planifikuara me tre orë vonesë.

“A duhet të dëgjojmë një këngë të bukur ndërsa presim?”, pyeti ai, duke bërë thirrje që “Ave Maria” të luhej në altoparlantët ndërsa mjekët merreshin me situatën, e cila ishte ndërprerja e dytë mjekësore gjatë fjalimeve të tij.

Më parë, Trump kishte ndërprerë një tjetër tubim në Pensilvani për një arsye të ngjashme. Ai shpjegoi se ishte vonë sepse po regjistronte një podcast tre orësh me Joe Rogan, të cilin e quajti “intervistën më të gjatë që kam bërë në jetën time”. Disa amerikanë e interpretuan muzikën e luajtur si një shenjë për t’u larguar nga mitingu i vonuar.

Princesha Anne është plagosur dhe është dërguar me urgjencë në spital, ku po trajtohet për tronditje dhe lëndime të lehta në kokë. Motra 73-vjeçare e Mbretit Charles, një kalorëse olimpike, ishte duke ecur në pronën e saj në Gatcombe Park në Gloucestershire kur u lëndua.

Mësohet se ajo ishte duke bërë një shëtitje në mbrëmje me kuaj kur u lëndua me plagë të lehta në kokë. Shkaku i dëmtimit të saj në kokë është ende i pakonfirmuar.

Bashkëshorti i Anne, zëvendësadmirali Sir Tim Laurence dhe fëmijët e saj, Zara Tindall e Peter Phillips, ishin të gjithë në pronë në kohën kur ajo u plagos.

Shërbimet e urgjencës mbërritën në vendngjarje dhe princeshës iu dha trajtimi përpara se të dërgohej në Spitalin Southmead në Bristol për analiza, trajtim dhe vëzhgim.
Angazhimet e Anne, këtë javë, janë shtyrë me këshillën e mjekëve të saj. Ajo nuk do të vizitojë më Kanadanë dhe nuk mund të marrë pjesë në një banket në Pallatin Buckingham.

Princesha Anne, së fundmi, ka qenë shumë e angazhuar në detyra duke qenë se Mbreti Charles për shkak të gjendjes shëndetësore ka anuluar pjesëmarrjen në evente të ndryshme. Po ashtu, Princi William ka marrë një pushim për t’u kujdesur për gruan e tij, e ndërsa dihet tashmë se Princi Harry dhe Meghan Markle janë larguar plotësisht nga detyrat mbretërore.

Një aksident i rëndë ka ndodhur këtë të hënë në rrugën Dragash-Zhur në Kosovë.

Një grua 42 vjeçe dhe vajza e saj 3-vjeç janë dërguar fillimisht në spitalin e Prizrenit, më pas për shkak të përkeqësimit të shëndetit në Qendrën Klinike Universitare (QKUK) në Prishtinë.

Ndërkohë, Policia e Kosovës ka njoftuar se fatkeqësisht dy nënë e bijë nuk ia kanë dalë dot dhe kanë ndërruar jetë.

 “Më datën 03.06.2024, rreth orës 10:50 është raportuar për një aksident trafiku të ketë ndodhur në rrugën Dragash-Zhur (Laku i Keq). Lidhur me rastin janë njoftuar njësitë kompetente policore të cilët menjëherë kanë dalë në vendngjarje.

Bazuar në informacionet e para në këtë aksident janë të përfshira një kamion me rimorkio dhe një automjet i udhëtarëve, si pasojë e këtij aksidenti dyshohet se dy persona kanë ndërruar jetë ( një grua 42 vjeçare dhe një fëmijë 3 vjeçar ), vdekjen e tyre e ka konstatuar stafi kompetent i emergjencës se spitalit rajonal në Prizren, ndërsa për rastin tjetër vdekjen e kanë konstatuar emergjenca e QKUK-ës  në Prishtinë, pasi që personi për shkak të lëndimeve është dërguar në Prishtinë”, thuhet në njoftim.

Këtë të premte, rreth orës 13:15, një ngjarje e rëndë është regjistruar në fshatin Pirg, Maliq, ku shtetasi K. M., 27-vjeç, banues në Pirg, ka përfunduar në spital, pasi ka rënë nga lartësia.

Sipas informacioneve policore, i riu ka qenë duke rregulluar çatinë e banesës së një shtetasi, kur është rrëzuar dhe ka marrë dëmtime trupore.

Pronari i banesës, ndodhet në ambientet e Komisariatit, për veprime të mëtejshme.

‘Më datë 31.05.2024, rreth orës 13:15, në fshatin Pirg, Maliq, shtetasi K. M., 27 vjeç, banues në Pirg, duke rregulluar çatinë e banesës së shtetasit R. Z., dyshohet se është rrëzuar aksidentalisht nga çatia dhe ka marrë dëmtime trupore. Aktualisht 27-vjeçari ndodhet në spitalin e Korçës në kujdesin e mjekëve.

Ndërsa pronari i banesës, ndodhet në ambientet e Komisariatit, për veprime të mëtejshme.

Grupi hetimor po punon për sqarimin e rrethanave të ngjarjes’.

Një ngjarje e rëndë është regjistruar pasditen e kësaj të martë në qytetin e Lushnjës, ku babai gjatë një konflikti fizik, ka plagosur me thikë të birin.

Nga informacionet paraprake, bëhet me dije se i plagosur është nisur me urgjencë drejt spitalit, ku po ashtu për ndihmë mjekësore është shoqëruar edhe babai 69-vjeçar, i cili ka marrë dëmtime fizike në pjesën e fytyrës.

NJOFTIMI I POLICISË: 

Lushnjë/Informacion paraprak

Rreth orës 18:00, në spitalin e Lushnjës, është paraqitur për ndihmë mjeksore shtetasi N. P., 39 vjeç, i cili dyshohet të jetë dëmtuar me mjet prerës (thikë), nga babai i tij, shtetasi B. P., 69 vjeç, gjatë një konflikti mes tyre.

Gjithashtu po shoqërohet për ndihmë mjekësore në spital edhe shtetasi B. P., pasi nga konflikti ka marrë dëmtime fizike në pjesën e fytyrës.

Grupi hetimor po punon për sqarimin e rrethanave të ngjarjes.