Gati 200 njerëz kanë vdekur në Vietnam si pasojë e tajfunit Yagi dhe më shumë se 125 rezultojnë të zhdukur pasi përmbytjet dhe rrëshqitjet e dheut kanë qenë tepër problematike, njoftuan mediat shtetërore të enjten. Gazeta VNExpress e Vietnamit raportoi se 197 persona kanë vdekur dhe 128 janë ende të zhdukur, ndërsa më shumë se 800 të tjerë janë plagosur.
Numri i të vdekurve u rrit më herët gjatë javës pasi një përmbytje shkatërroi thuajse të gjithë fshatin Lang Nu në provincën Lao Cai të Vietnamit verior të martën. Qindra persona, personelë shpëtimi punuan pa u lodhur të mërkurën për të kërkuar të mbijetuarit, por që nga mëngjesi i së enjtes 53 fshatarë mbetën të zhdukur, raportoi VNExpress, ndërsa shtatë trupa të tjerë u gjetën, duke e çuar numrin e të vdekurve atje në 42.
Yagi ishte tajfuni më i fortë që goditi vendin e Azisë Juglindore në dekada. Ai arriti në tokë të shtunën me erëra deri në 149 km/h (92 mph). Pavarësisht dobësimit të dielën, reshjet vazhduan dhe lumenjtë mbeten jashtëzakonisht të lartë. Shirat e dendur dëmtuan gjithashtu fabrikat në qendrat industriale të Vietnamit verior të fokusuara në eksport./CNN/
