Adriatik BALLA
Qazim Laçi, Myrto Uzuni e Jasir Asani ishin disa prej lojtarëve të Kombëtares që shënuan gola në ndeshjet e fundjavës në kampionatet e tyre ku aktivizohen, nga Europa e në Azi. Paraqitje të mirë bënë edhe disa lojtarë të tjerë, por për treshen e mësipërme ka vlerë të përmenden pasi do të jenë në formacionin titullar në ndeshjet e tetorit që Kombëtarja do të luajë në transfertë ndaj Çekisë dhe Gjeorgjisë. Duhet theksuar se trajneri Silvinjo ka marrë sinjale mjaft të mira këtë javë nga një pjesë e madhe e titullarëve, të cilët jo vetëm u angazhuan në formacionin bazë të ekipeve të tyre, por patën edhe statistika të mira gjatë ndeshjes, statistika që janë të vlefshme në kuadër të ndeshjeve të përfaqësueses në Nations League. Sa më e mirë forma e lojtarëve, aq më shumë cilësi ka në fushë dhe më shumë pretendime për të marrë maksimumin ndaj kundërshtarëve në grupin tonë të Ligës së Kombeve.
