Dymbëdhjetë emigrantë egjiptianë besohet se kanë vdekur pasi anija me të cilën po udhëtonin u përmbys në Tobruk në Libinë lindore. Lajmin e thanë sot dy burime egjiptiane të sigurisë. Mësohet se një burrë u shpëtua nga rrënojat.
13 burrat ishin nisur për në Itali të dielën mbrëma, thanë burimet, duke cituar informacionin që ata morën nga i mbijetuari përmes autoriteteve libiane. Këta njerëz erdhën nga provincat al-Sharqiya dhe Gharbiya të Egjiptit. Kohët e fundit ka pasur një rritje të numrit të egjiptianëve që tentojnë kalimin e rrezikshëm të Mesdheut me synimin për të arritur në Evropë, pasi janë përballur me papunësi dhe inflacion të lartë në vendin e tyre.
