Adriatik BALLA
Arabia Saudite investon shumë në këtë periudhë në sport. Ambiciet e sauditëve janë të angazhojnë në kampionatin e tyre të futbollit lojtarët më të mirë dhe ata që kanë impakt të madh tek publiku, por edhe të presin një Kupë Bote, për të cilën po investojnë që tani dhe po lobojnë në FIFA. Ndërkohë, emra të mëdhenj futbolli si Ronaldo, Benzema, Mane e shumë të tjerë kanë zgjedhur të luajnë në superligën saudite. Atje ka shkuar edhe ylli brazilian Nejmar, por forma e dobët si pasojë e dëmtimeve e ka penguar të luajë dhe për këtë ka dilema. E ardhmja e Nejmar në Arabinë Saudite po bëhet gjithnjë e më e panjohur.
Lojtari aktual i Al-Hilal, që para disa javësh po ndihej përsëri futbollist pas më shumë se një viti jashtë fushave, u detyrua të largohej nga ndeshja e fundit në Champions League aziatike kundër Esteghlal pas një dëmtimi në femoralis në minutën e 30-të. Pas një operacioni të rëndë në gju që e la brazilianin jashtë loje në sezonin e tij të parë në futbollin saudit, 23/24, Nejmar rikthehet sërish jashtë fushave, duke rikthyer makthet e dëmtimeve, probleme fizike që kanë bërë që alarmet të bien në zyrat e ekipit. Sipas kanalit “Action Ma3 Valed,” i cili zotëron të drejtat e transmetimit të ligës profesioniste të Arabisë Saudite, Al Hilal ka thënë “mjaft” me yllin e tyre dhe është i hapur ta lërë të largohet në janar. Drejtuesit e klubit janë të lodhur nga problemet e vazhdueshme fizike të Nejmarit, i cili mbërriti në verën e vitit 2023 si “bomba e madhe” e merkatos dhe për të cilin paguan një shumë astronomike prej 90 milionë eurosh.
Deri tani, ai është kthyer në një humbje të panevojshme parash. Në atë kohë, sulmuesi tashmë ishte 31 vjeç dhe vinte nga një ndër sezonet më të dobëta me PSG-në, ku u largua mes polemikave dhe tifozët e kishin kundër. Megjithëse kishte oferta nga klube të mëdha europiane, Nejmar vendosi të largohej nga Europa në kërkim të parave saudite dhe u bë një nga futbollistët më të paguar në botë. Ai nënshkroi kontratë deri në vitin 2025, ku fiton 100 milionë euro në sezon. Në çdo rast, burimi i përmendur konfirmon se Al Hilal nuk do ta regjistrojë Nejmarin në janar, duke synuar të përshpejtojë largimin e tij dhe të harrojë eksperiencën e tij në klub. Mbetet të shihet se si do të sillen palët kur të afrojë merkato dimërore, por me këtë formë që ka shfaqur Nejmar vështirë se arabët do ta mbanin më tej. Nejmar duket që tani se është kosto për klubin.
