Një ngjarje tragjike ka ndodhur në Teksas, ku pesë persona u plagosën nga një shtetas, ende i paidentifikuar, i cili hyri me kamionçinë mes një grupi njerëzish jashtë një qendre tregtare, Killeen Mall.
Autoritetet thanë se mosha e të plagosurve varionte nga 6 deri në 75 vjeç, por nuk dhanë detaje të tjera për gjendjen e tyre. Pas ngjarjes, policia e shtetit të Teksasit, përfshirë edhe një oficer që punonte si roje në qendrën tregtare, arriti të ndalonte autorin, duke e qëlluar për vdekje.
Forcat e policisë, përfshirë edhe ata jashtë detyrës, tentuan ta ndalonin të dyshuarin, i cili ngiste një kamionçinë të zezë. Ai ia doli që të hynte përmes parkingut të qendrës tregtare, duke goditur shumë njerëz.
Aktualisht, autoritetet po hetojnë nëse ngjarja ishte e qëllimshme. Sipas policisë, nëse nuk do të ishte ndërhyrja e shpejtë, pasojat mund të ishin më të rënda.
Killeen, qyteti ku ndodhi ngjarja, ka rreth 160,000 banorë dhe ndodhet rreth 70 milje në veri të Austin.
