KUÇOVË – Emisioni Fiks Fare solli mbrëmjen e sotme rastin e një qytetari nga fshati Bardhaj i Kuçovës i cili për shkak të një faqeje në Tik Tok, ka shkuar deri në tentativë vetëvrasje.
Një 72-vjeçare e shqetësuar për gjendjen e djalit të saj tregon se atij i është hapur një faqe në Tik Tok, ku e tallin dhe e akuzojnë se ngacmon një 15 vjeçare.
“Djali im është i urtë, sheh punën e vet, askënd nuk ngacmon, i kanë hapur faqe në Tik Tok dhe unë e gjeta me litar në dorë që të shkonte dhe varte veten, por ju luta të mos e bënte” tregon e përlotur zonja Hava. Sipas saj djali është shumë i shqetësuar dhe rri gjithë kohën vetëm.
Ndërkohë djali edhe pse është 37 vjeç, denigrimi dhe akuzat që i bëhen nga kjo faqe i ka shkaktuar shumë shqetësim. “Jam shumë i shqetësuar, është imazhi im, unë kurrë s’kam ngacmuar të mitura, më marrin njerëzit në telefon dhe më thonë çfarë është kjo” thotë ai.
38 – vjeçari pranon se e ka menduar vetëvrasjen, pasi për të kjo që i ka ndodhur është shumë e rëndë. “Unë e mendoj po sikur të isha baba dhe të ishte hapur një gjë e tillë, po nëse i hapet mbesës sime? Kjo është shumë e rëndë , ndaj dua të mbyllet” thotë ai.
Gazetarët e Fiksit janë interesuar edhe në Komisariatin e Policisë Kuçovë të cilët kanë kërkuar që qytetari të shkojë në Komisariatin e Beratit, duke qenë se aty ka një sektor për krimin kibernitik.
Pas të gjitha procedurave dhe ankesat u arrit në një fund të lumtur. Faqja e Tik Tok-ut që publikoheshin imazhe të 37 vjeçarit duke e denigruar dhe akuzuar, tashmë nuk ka më publikime të tilla duke u mbyllur./Top Channel
