Itali- Një ngjarje e rëndë kriminale ka ndodhur në një berberhane në lagjen Centocelle të Romës, ku një debat për motive të lehta ka përfunduar në tentativë vrasjeje. Një 29-vjeçar shqiptar ka plagosur rëndë me gërshërë në qafë një punonjës berberhaneje, 24-vjeç me origjinë indiane.
Ngjarja ka ndodhur në rrugën “Filippo Parlatore”, ku pas një konflikti verbal, autori, i cili ka precedent penal, ka rrëmbyer një palë gërshërë dhe ka qëlluar viktimën. I plagosuri u transportua në gjendje të rënduar në spitalin “Umberto I”, ku ndodhet jashtë rrezikut për jetën.
Autori u largua nga vendngjarja në këmbë, por u identifikua përmes kamerave të sigurisë dhe dëshmive të pranishmëve. Ai u arrestua mëngjesin e ditës pas ngjarjes, në një park në zonën Tor Sapienza.
Sipas hetimeve, 29-vjeçari ishte në kërkim për shkelje të masës së arrestit shtëpiak, të caktuar më parë për vepra të tilla si trafik droge, falsifikim dokumentesh dhe rezistencë ndaj policisë , raportoi Sinjali. Ai ndodhet tashmë në burgun Rebibbia dhe pritet të dalë para gjykatës në ditët në vijim, nën akuzën për tentativë vrasjeje.
