Bulqizë – Arrestohet një 20-vjeçar që qarkullonte i armatosur me pistoletë dhe municion luftarak
Bulqizë, 2 gusht 2025 – Një 20-vjeçar nga fshati Peshk, Njësia Administrative Martanesh, është ndaluar nga policia në aksin rrugor Krastë–Bulqizë, pasi u kap në flagrancë duke qarkulluar me armë zjarri pa leje.
Sipas burimeve zyrtare, gjatë kontrollit të ushtruar në automjetin tip “Benz” kamionçinë që drejtonte i riu, shërbimet e Policisë kanë gjetur një armë zjarri pistoletë e llojit “Zastava”, së bashku me një krehër që përmbante 10 fishekë. Arma ishte fshehur në automjet.
Shtetasi Orgest Grrica, 20 vjeç, u arrestua në vendngjarje dhe ndaj tij do të ndiqen procedurat ligjore për veprën penale të armëmbajtjes pa leje.
Arma, fishekët dhe automjeti janë sekuestruar si prova materiale. Rasti i referohet Prokurorisë pranë Gjykatës së Shkallës së Parë të Juridiksionit të Përgjithshëm Dibër për hetime të mëtejshme.
Ky është një tjetër rast i rrezikshëm i qarkullimit të armatosur në zona rurale, që vë në rrezik sigurinë publike. /noa.al
