Elbasan – Një aksident i rëndë me pasojë dy viktima dhe 14 të plagosur ka ndodhur mëngjesin e sotëm në aksin kombëtar Peqin-Elbasan, në fshatin Bishqem.
Në aksident janë përfshirë një automjet tip Benz dhe një furgon pasagjerësh, i drejtuar nga shtetasi Anesti Bufi. Përplasja ka qenë tepër e fortë, duke shkaktuar dëme të rënda materiale dhe humbje jetësh.
Fatkeqësisht, dy persona nuk kanë mundur t’i mbijetojnë plagëve dhe kanë ndërruar jetë në vendngjarje. Ndërsa 14 të plagosur, përfshirë drejtuesin e furgonit dhe disa pasagjerë, janë transportuar me urgjencë në Spitalin Rajonal të Elbasanit, ku po marrin ndihmën e nevojshme mjekësore.
Shërbimet e policisë dhe zjarrfikësve mbërritën menjëherë në vendngjarje dhe bënë të mundur nxjerrjen e trupave nga automjeti i dëmtuar rëndë.
Grupi hetimor po punon për të përcaktuar shkaqet e aksidentit, ndërsa dyshohet se shpejtësia e lartë dhe kushtet e rrugës mund të kenë qenë faktorët kryesorë të përplasjes fatale.
Elbasan/Informacion paraprak
Mëngjesin e sotëm, në aksin rrugor “Elbasan-Peqin”, në fshatin Paulesh, furgoni që drejtohej nga shtetasi A. B., 44 vjeç, është përplasur me automjetin tip “Benz”, me drejtues shtetasin K. Sh.
Si pasojë e përplasjes kanë humbur jetën drejtuesi i automjetit tip “Benz” shtetasi K. Sh., dhe shtetasja F. Sh., 55 vjeçe, pasagjere në këtë automjet.
Gjithashtu, janë dëmtuar drejtuesi i furgonit, shtetasi A. B., dhe 4 pasagjerë që udhëtonin me furgon, të cilët janë transportuar në spital për ndihmë mjekësore dhe janë jashtë rrezikut për jetën.
Shërbimet e Policisë dhe grupi hetimor ndodhen në vendngjarje dhe vijojnë punën për zbardhjen e plotë të rrethanave dhe shkakut të aksidentit.
