Peqin, 22 mars 2025 – Finalizohet operacioni policor i koduar “Revealed” pas një hetimi disamujor me metoda proaktive.
Në kuadër të këtij operacioni, janë zbardhur 8 vjedhje në banesa të pa banuara në Peqin, të ndodhura përgjatë dy viteve. Si rezultat i hetimeve, janë sekuestruar pajisje elektronike, elektrike, orendi shtëpiake, televizorë, kondicionerë, biçikleta, bizhuteri dhe municion luftarak.
Policia ka vënë në pranga dy autorë të dyshuar, shtetasit A. C., 38 vjeç, i dënuar më parë për vjedhje, dhe I. S., 48 vjeç. Po ashtu, janë proceduar penalisht dy shtetas: A. Q., 49 vjeç, i cili dyshohet se ka transportuar sendet e vjedhura, dhe K. B., 65 vjeçe, që kishte dijeni për krimin dhe nuk ka kallëzuar, pasi u kishte dhënë me qira autorëve një ambient për grumbullimin e sendeve të vjedhura.
Në kërkim është shpallur shtetasi B. H., 33 vjeç, i cili dyshohet se ka përdorur automjetin e tij për mundësimin e vjedhjeve.
Gjatë operacionit, janë sekuestruar 4 televizorë, 5 kondicionerë, 6 biçikleta, orendi shtëpiake, pajisje elektronike dhe elektrike, bizhuteri, fishekë luftarak dhe 1 automjet që autorët përdornin për vjedhjet.
Materialet procedurale janë kaluar në Prokurorinë e Elbasanit për veprime të mëtejshme.
