Komisioni Qendor i Zgjedhjeve (KQZ) i ka hequr mandatin si kryebashkiak i zgjedhur i Himarës, Fredi Beleri duke i shuar kështu shpresat për të drejtuar këtë bashki.
Vetë Beleri ishte prezent në këtë seancë, ku iu komunikua edhe heqja e mandatit si kryebashkiak.
Belerit i është hequr mandati për shkak të ligjit të dekriminalizimit, pasi ai është i dënuar me 2 vite burg për shitblerje votash.
Celibashi: Mund të ishte edhe në kushtet kur të ishte duke ushtruar detyrën, e ngelet diskutimi, në kushtet kur vërtetohet që të kryehet një vepër penale, a e ka kompetencën KQZ për të zhvlerësuar këtë mandat? Unë jam i bindur se po. Ty ligji të ndalon që të mos kandidosh, aq më shumë akoma të ndalohet që ta ushtrosh këtë detyrë. Mendoj që kjo është shumë e qartë. Situata kjo është. Sepse për ndryshe do të duhet të pranonim që ti e ke kryer këtë vepër penale, vazhdon në detyrë, por nuk do garosh më. Unë mendoj që jemi në kushtet e humbjes së mandatit. Shpallim të pavlefshëm këtë mandat. Kundër këtij vendimi mund të bëhet ankimim.
Kujtojmë që kjo mbledhje e KQZ ka ardhur disa ditë pasi Apeli i GJKKO-së “vulosi” fatin e Belerit. Tre gjyqtarët Daniela Shirka, Dhimiter Lara dhe Ilirjana Olldashi vendosën të lënë në fuqi vendimin e Gjykatës së Posaçme kundër Korrupsionit dhe Krimit të Organizuar, e cila vendosi masën e sigurisë 2 vite burg për Belerin, pasi akuzohet për korrupsion aktiv në zgjedhjet lokale të vitit të kaluar.
Pas vendimit të Apelit të GJKKO-së, Partia Socialiste, depozitoi një kërkesë në KQZ ku dhe i kërkuan shpalljen e zgjedhjeve të parakohshme për Bashkinë e Himarës.
