Operacioni i koduar “Wanted” ka çuar në kapjen e shtetasit Elvis Ndreca, 28 vjeç, banues në Lezhë, i shpallur në kërkim dhe i akuzuar nga SPAK për sigurimin e kushteve dhe mjeteve materiale për kryerjen e një vrasjeje, në kuadër të një grupi të strukturuar kriminal.
Operacioni, i realizuar nga Seksioni për Hetimin e Krimeve të Rënda në bashkëpunim me Sektorin e Forcës së Posaçme për Operacionet Speciale dhe Kërkimin, u bazua në informacionet e siguruara nga inteligjenca policore për vendndodhjen e shtetasit në kërkim. Pas një operacioni të mirëorganizuar, u arrit të lokalizohej dhe kapej Elvis Ndreca, për të cilin Gjykata e Posaçme e Shkallës së Parë për Korrupsionin dhe Krimin e Organizuar Tiranë kishte caktuar masën e sigurisë “Arrest në burg”.
Ai akuzohet për veprat penale “Sigurimi i kushteve dhe mjeteve materiale për të kryer vrasje”, “Pjesëmarrja në grup të strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Elvis Ndreca është dorëzuar në Drejtorinë Vendore të Policisë Lezhë, ku do të vazhdojnë veprimet e mëtejshme procedurale. Ky është një tjetër sukses i rëndësishëm në luftën kundër krimit të organizuar dhe grupimeve kriminale.
