Tragjedi gjatë pushimit të drekës: humb jetën një punëtor shqiptar në kantierin e Casentino-s (L’Aquila)
Një ngjarje e rëndë ka ndodhur në Casentino, një fshat i komunës Sant’Eusanio Forconese në provincën e L’Aquila-s, ku një punëtor me origjinë shqiptare ka ndërruar jetë si pasojë e një mali të papritur gjatë pushimit të drekës në një kantier ndërtimi.
Viktima është Hasan Senja, 65 vjeç. Sipas të përditshmes italiane Il Centro, ai ishte me origjinë shqiptare, por prej kohësh banonte në Itali. Punonte për kompaninë e ndërtimit të familjes së tij, e cila ishte duke kryer punime në rrugën “Capo La Terra” në Casentino.
Ekipet e urgjencës mbërritën menjëherë në vendngjarje, por për fat të keq punëtori kishte ndërruar jetë para mbërritjes së ndihmës. Edhe ndërhyrja e helikopterit të emergjencës rezultoi e kotë dhe u tërhoq pa mundur të ndërhyjë.
Të parët që mbërritën në vend ishin karabinierët e stacionit të Assergi-t. Fillimisht u mendua se bëhej fjalë për një aksident në punë, por rrethanat treguan menjëherë një situatë tjetër. Për ngjarjen ka nisur hetim Prokuroria e L’Aquila-s. Siç parashikohet nga praktikat ligjore, është aktivizuar edhe shërbimi i mjekësisë së punës i ASL 1 për të kryer verifikimet e nevojshme.
Vdekja e Hasan Senjës ka shkaktuar trishtim të thellë në komunitetin lokal, ku ai ishte i njohur dhe i vlerësuar jo vetëm si punëtor, por edhe si qytetar i ndershëm dhe pjesë e pandarë e jetës së përditshme.
Ka reaguar edhe kryetari i bashkisë së L’Aquila-s, Pierluigi Biondi, i cili në një deklaratë për mediat është shprehur: “Vdekja e punëtorit Hasan Senja, ndodhur gjatë një pushimi pune në Casentino, na ka tronditur thellë. Ai ishte pjesë e pandashme e komunitetit tonë, i rrënjosur thellë në jetën sociale të qytetit, të cilit i kontribuoi me përkushtim dhe dinjitet gjatë proceseve të rindërtimit. Në emër të administratës komunale dhe gjithë qytetit të L’Aquila-s, i shpreh ngushëllimet më të sinqerta familjes së tij.”
Hetimet për të sqaruar rrethanat e plota të ngjarjes vijojnë. /noa.al
