Autoritet italiane kanë vënë në pranga një 30-vjeçar shqiptar në Albano Laziale. Arrestimi i shqiptarit ka ardhur pas një ndjekjeje të automjetit të tij. Në mjetin me të cilin udhëtonte i arrestuari mesohet se ishin edhe 3 pasagjerë që dyshohet se janë po shqiptarë. Ata arritën të arratiseshin në këmbë, pas rrëmujës së krijuar në zonën e ngjarjes.
Pas ndalimit dhe kontrollit, iu gjetën në makinë mjete që shërbenin për të kryer grabitje dhe pajisje të dyshimta që u sekuestruan si prova materiale. Dyshohet se shqiptari është pjesë e një bande skifterësh, që operonte në Castelli Romani. Pasi pikasi patrullën e karabinierëve, i riu u përpoq t’i shmangej kontrollit. Ai rriti shpejtësinë dhe tentoi arratisjen, por patrullat e bllokuan në ndjekje.
Ngjarja ka ndodhur orët e vona të 5 janarit, teksa në mjet ka pasur të paktën 4 persona të dyshuar. Shpejtësia e shoferit vuri në rrezik edhe efektivët e patrullës dhe shoferët e tjerë që qarkullonin në ato momente.
Midis sendeve të sekuestruara ishin një gërshërë elektrike, një kamxhik, një shkallë teleskopike, disa radio me dy drejtime, tre kapele, kaçavida dhe leva. I arrestuari nuk ka mundur të japë shpjegime të besueshme në lidhje me praninë e këtyre instrumenteve në bagazhin e tij, duke nxitur dyshimet e hetuesve. Gjithashtu shqiptari akuzohet edhe për rezistencë dhe kundërshtim të policisë.
