Në orët e para të mëngjesit të 1 janarit 2025, në një ambient festiv në rrugën “Liman Kaba” në Tiranë, u raportua për të shtëna me armë zjarri në ajër. Policia e Tiranës, pas një shqyrtimi të kamerave të sigurisë, ka arritur të identifikojë autorin, i cili është shpallur në kërkim.
Ngjarja ka ndodhur pranë Parkut Olimpik, në një moment kur ambienti ishte i mbushur plot me të rinj. Fatmirësisht, nga të shtënat nuk ka pasur asnjë të lënduar.
Shërbimet e Komisariatit të Policisë Nr. 2 kanë nisur menjëherë hetimet, duke marrë dëshmitë e qytetarëve dhe duke shqyrtuar kamerat e sigurisë. Aktualisht, po vijon puna për kapjen e autorit dhe përfundimin e hetimeve, në bashkëpunim me Prokurorinë e Rrethit. Policia ka njoftuar se nuk mund të publikojë ende emrin e autorit për shkak të hetimeve që po zhvillohen.
Njoftimi i Policisë:
Shërbimet e Komisariatit të Policisë Nr.2, pas njoftimit të marrë për të shtëna me armë në një ambient festiv në rrugën “Liman Kaba” me datë 01.01.2024, në orët e para të mëngjesit, menjëherë kanë organizuar punën me qëllim identifikimin e autorit dhe dokumentimin e plotë të ngjarjes.
Në vijim të veprimeve intensive shërbimet e Komisariatit të Policisë Nr.2, shoqëruan dhe pyetën në cilësinë e personit që ka dijeni për ngjarjen shumë shtetas të cilët dhanë deklaratën e tyre në lidhje me ngjarjen.
Po në vijim të veprimeve si rezultat dhe i këqyrjes së kamerave, është bërë i mundur identifikimi i shtetasit që kishte qëlluar me armë zjarri në ajër. Për arsye se hetimi vijon nuk bëjmë me dije gjeneralitet e tij. Nga ngjarja nuk ka pasur asnjë person të lënduar.
Komisariati i Policisë Nr.2, në bashkëpunim me Prokurorinë e Rrethit po punojnë për dokumentimin e plotë e ngjarjes si dhe për kapjen dhe vënien përpara përgjegjësisë penale të autorit të dyshuar.
