Presidenti amerikan Donald Trump, gjatë një konference për media të mbajtur dje, komentoi për herë të parë pas shumë kohësh mbi marrëdhënien e tij me producentin e njohur muzikor Sean Combs, i njohur botërisht si P. Diddy.
Komentet u nxitën nga një pyetje e gazetarëve, pas vendimit të Trump për të falur yjet e televizionit Todd dhe Julie Chrisley – të dënuar në vitin 2022 për mashtrim fiskal, por të falur këtë javë. Gazetarët e pyetën nëse kishte menduar ndonjëherë të falte edhe P. Diddy-n, i cili aktualisht përballet me probleme serioze ligjore.
“Në fakt, kjo është hera e parë që dikush më pyet për këtë,” tha Trump. “E di që shumë njerëz e kanë diskutuar këtë mundësi, por unë nuk e kam ndjekur shumë këtë çështje. Nuk kam pasur kontakt me të prej vitesh.”
Trump pranoi se kishte pasur një marrëdhënie të mirë me P. Diddy-n në të kaluarën, por ajo ndryshoi kur ai u fut në politikë.
“Më parë më donte shumë,” u shpreh ai. “Por mendoj se marrëdhënia u prish kur kandidova për president. Kam lexuar disa deklarata negative për mua nga ana e tij. Nuk më ka thënë asgjë personalisht, por duket se qëndrimi i tij ndryshoi.”
I pyetur nëse do ta falte, Trump u shpreh se nuk do të vepronte mbi bazën e simpatisë personale:
“Do të shikoja faktet. Nëse dikush është abuzuar apo trajtuar padrejtësisht, kjo do të kishte më shumë rëndësi për mua sesa fakti nëse më pëlqen apo jo.”
Në përmbyllje, Trump theksoi se vendimet e tij nuk janë një “garë popullariteti”, por bazohen në atë që ai e konsideron të drejtë për vendin:
“Nëse do të bëja gjëra vetëm për të qenë i pëlqyer, ndoshta do të më donin më shumë njerëz. Por unë dua që Amerika të ecë përpara, jo vetëm të marr duartrokitje.”
