Politikani danez Anders Vistisen shkaktoi një moment të tensionuar në Parlamentin Evropian me një mesazh të drejtpërdrejtë për Presidentin amerikan Donald Trump, lidhur me idenë e tij për të blerë Grenlandën. Vistisen u shpreh me një ton të ashpër dhe tha se Grenlanda ka qenë pjesë e Danimarkës për 800 vjet dhe nuk është në shitje, duke e mbyllur mesazhin e tij me një fjalor të paspecifikuar, i cili nxiti reagimin e kolegëve të tij në Parlamentin Evropian.
Pas përdorimit të gjuhës së papërshtatshme, nënkryetari i Parlamentit Evropian, Nicolae Stefanuta, i bëri një tërheqje vëmendjeje Vistisen, duke i kujtuar atij se përdorimi i fjalëve të tilla është i papranueshëm dhe do të kishte pasoja. Vistisen, megjithatë, mbrojti qëndrimin e tij dhe e përsëriti mesazhin, duke postuar edhe në X, duke theksuar rëndësinë e sovranitetit kombëtar të Danimarkës dhe duke kritikuar idenë e Trump-it si një “sulm” ndaj këtij sovraniteti.
