Detaje të reja janë zbardhur në lidhje me ngjarjen e rëndë të ndodhur sot në Kosovë, ku humbi jetën 26-vjeçari Ideal Halabaku.
Sipas mediave në Kosovë, ngjarja ka ndodhur në vendin e quajtur “Ura e Kaçanikut” në autostradën “Arbën Xhaferi”. Paraprakisht u tha se Halabaku ishte përfshirë në një aksident dhe në tentativë për t’u larguar nga vendi i ngjarjes, kishte rënë poshtë urës.
Megjithatë, sipas një njoftimi të fundit, policia deklaron se i riu nuk ka ndërruar jetë nga aksidenti. Uniformat blu nuk japin detaje të tjera, teksa hetimet mbi ngjarjen vazhdojnë.
Njoftimi i policisë:
Më datë 08.06.2025, rreth orës 13:15, jemi njoftuar nga një qytetar për gjetjen e trupit të pajetë të viktimës I.H (M/K) i moshës 26 vjeç.
Dyshohet se viktima kishte pësuar aksident trafiku rreth orës 05:00 të mëngjesit në autostradën “Arbën Xhaferi”, afër fshatit Bob, komuna e Kaçanikut.
Menjëherë pas pranimit të informacionit, në vendin e ngjarjes kanë dalë njësitet përkatëse të Trafikut të Autostradës. Pas ekzaminimeve fillestare nga hetuesit e trafikut, është konstatuar se vdekja e viktimës nuk ka ardhur si pasojë e aksidentit.
Në vendin e ngjarjes kanë dalë edhe hetuesit e stacionit policor Kaçanik, ndërsa rreth orës 16:45, janë angazhuar edhe Hetimet Rajonale dhe Forenzika Rajonale.
Për të gjitha veprimet policore është njoftuar prokurori për krime të rënda nga Prokuroria Themelore e Ferizajt, i cili ka autorizuar inicimin e rastit si: “Hetim mbi vdekjen”.
