Një zjarr i madh ka shpërthyer në Sandbank Road, Hilltown, në Irlandën e Veriut, duke u bërë pjesë e një serie zjarresh që kanë përfshirë Mbretërinë e Bashkuar gjatë javës së fundit. Zjarret janë nxitur nga kushtet e pazakonta të nxehtësisë dhe thatësirës që kanë kapluar vendin në këtë periudhë pranverore.
Sipas Shërbimit të Zjarrfikësve dhe Shpëtimit të Irlandës së Veriut, më shumë se 100 zjarrfikës dhe 14 mjete zjarrfikëse janë angazhuar për të përballuar flakët në këtë zonë të përfshirë nga zjarri “i rëndësishëm”.
Situata është shqetësuese edhe në pjesë të tjera të Britanisë. Në Angli janë raportuar disa vatra zjarri si pasojë e kushteve klimatike ekstreme për këtë kohë të vitit. Ndërkohë në Skoci, helikopterë janë mobilizuar për të ndihmuar në fikjen e zjarrit të katërt brenda javës. Policia skoceze raportoi gjithashtu se një zjarr që ka shpërthyer në zonën e Newton Stewart është përhapur drejt veriut.
Autoritetet po bëjnë thirrje për vigjilencë maksimale, duke paralajmëruar qytetarët të shmangin çdo aktivitet që mund të shkaktojë zjarr dhe të ndjekin udhëzimet e sigurisë nga shërbimet emergjente. Kushtet ekstreme meteorologjike kanë ngritur alarmin për rrezikun e zjarreve në të gjithë vendin, ndërkohë që parashikimet nuk sugjerojnë përmirësim të menjëhershëm të motit.
