Biznesmeni Edvin Prençe ka folur për rënien e euros dhe ndikimin që ka pasur kjo e fundit tek sektori i tyre.
Në një intervistë, ai theksoi se sektori i tyre ka pasur një rënie prej 9 milionë eurosh ndërsa shtoi se do të jetë e vështirë që të ju vijnë investitorë të huaj.
Mes të tjerash ai nënvizoi se në fillim të shtatorit shumë biznese do e kenë të vështirë që të rindezin makineritë e tyre.
“Sektori ynë ka një rënie prej rreth 9 milion euro ose 900 mln lekë të reja. Situata është e frikshme. Po ta marrim në nivel të të gjithë eksportuesve që nga fillimi i vitit është një humbje në rreth 100 milion euro. Situata është shumë e disfavorshme ose mund të themi e frikshme pasi shumë biznese tani kanë mungesë të theksuar likuiditeti. Ka biznese që tani po fillojnë të reduktojnë linjat e tyre prodhuese duke pasur një mungesë të theksuar dhe pse jo dhe të porosive që vijnë nga jashtë. Shumë biznese në fillim të shtatorit do e kenë të vështirë të rindezin makineritë e tyre. Mos-rindezja e këtyre makinerive do të ketë dhe një impakt social’- tha ai.
