Partia Demokratike me anë të një deklarate shprehet se është kundër vendimit të qeverisë për shtyrjen e koncesionit të markimit dhe karburanteve. Gjithashtu, sipas PD kjo aferë bie mbi kurrizin e konsumatorëve të cilët gjatë këtyre viteve kanë paguar përmes çmimit të rritur të karburanteve. “Partia Demokratike është qartësisht kundër vendimit të qeverisë për të shtyrë koncesionin e markimit të karburanteve, pasi ka dështuar tërësisht në përpjekjen për të luftuar kontrabandën. Për PD, kjo është një aferë që bie në kurrizin e konsumatorëve që gjatë gjithë këtyre viteve kanë paguar përmes çmimit të rritur të karburantit. Normalisht Kontrata e Koncensionarit të Markimit duhet të përfundonte më 01.08.2023, por edhe pas kësaj date kompanitë kanë vijuar të paguajnë, përndryshe nuk u bëhej zhdoganimi. Shpjegimi që ka dhënë koncesionari për shtyrje lidhet me mosmarkimin e naftës bruto, e cila sipas tyre është e pamundur që të kryhet nga operatorët e tregut. Shoqata e Shoqërive të Hidrokarbureve ka qenë kundër kësaj shtyrje. Madje shoqatat kanë kërkuar shpjegime nga institucionet se përse duhet të shtyhet afati i markimit. Gjë për të cilën ata nuk kanë marrë asnjë përgjigje zyrtare. Sipas tyre ky koncesion nuk ka dhënë rezultate për të luftuar kontrabandën, pasi preket nafta që del në treg dhe ajo që nuk paguan akcizë. Gati për 9 vite janë marrë në çmimin e naftës 30 mln euro. Tarifën e markimit e kanë paguar konsumatorët pasi në çdo litër naftë qytetarëve u merret 1 lekë për litër. Për Partinë Demokratike është e qartë se shtyrja e tij edhe për një vit do të rëndojë në çmimin e naftës ku do të merren 7-8 milionë euro të tjera nga xhepat qytetarëve. Ja pra pse kemi çmimet më të larta në rajon, sepse për çdo litër naftë rreth 130 lekë shkojnë vetëm taksa. PD ka bërë dhe bën thirrje për uljen e barrës fiskale apo taksave që ngarkojnë dhe rrisin artificialisht çmimet e produkteve dhe shërbimeve bazë. Tregu vetfunksionon nëse lihet i lirë dhe në konkurrencë, por fatkeqësisht në Shqipëri ndodh e kundërta. PD do të vijojë denoncimet publikisht dhe në organet përkatëse për çdo rast abuzimi, vjedhje dhe korrupsioni”, përfundon reagimi i PD.
