Katër pushues, të cilët kishin ngelur në det të hapur, janë shpëtuar mëngjesin e sotëm nga policia në Ksamil.
Uniformat blu njoftojnë se pushuesit kishin ngelur me një pedalon, të cilin nuk e nxirrnin dot në breg për shkak të erës dhe dallgëve të larta. Mes tyre, ishin dhe dy fëmijë të mitur. Të 4 turistët janë në gjendje të mirë shëndetësore.
Policia kufitare informon se , ‘pas kërkesës për ndihmë, të ardhur për 4 shtetas të cilët ishin bllokuar në det me një pedalon që nuk mund ta nxirrnin në breg, për shkak të ndryshimit të menjëhershëm të kushteve meteorologjike dhe dallgëve të larta të detit, shërbimet e Policisë Kufitare të Sarandës dhe ato të repartit të Delta Forcës kanë organizuar punën, me qëllim ofrimin e menjëhershëm të ndihmës.
Si rezultat i mbërritjes së shpejtë në zonën e sinjalizuar, të 4 shtetasit (2 prej tyre të mitur) janë shpëtuar dhe janë nxjerrë në breg, në gjendje të mirë shëndetësore.
Policia e Shtetit fton çdo qytetar/turist që gjendet në një nevojë që lidhet me detyrat funksionale të Policisë, të kërkojë ndihmë, dhe reagimi do të jetë i menjëhershëm.’
