Ngjarja që ditën e djeshme u raportua si aksidentale, rezulton të jetë një krim brenda familjes. Policia ka bërë me dije këtë të Shtunë se 56-vjeçari Durmish Gllucaj i cili humbi jetën dje në Gjorm të Selenicës prej shpërthimit të një lënde plasëse është vrarë nga djali i tij Mato Gllucaj 23 vjeç.
Lajmi i djeshëm: Shpërthen bombola e gazit, vdes 50-vjeçari në Selenicë
Mësohet se i riu e ka vënë lëndën plasëse në sobën me gaz në oborrin e banesës së tyre, duke i shkaktuar kështu vdekjen babait të tij.
Ajo që e bën akoma më të rëndë ngjarjen, janë provat materiale të sekuestruara në banesën e Gllucajt.
Që nga granatat e dorës, kallëpet e tritolit e deri te fishekë e armë zjarri. Nuk dihet ende se pse 23-vjeçari posedonte këtë arsenal luftarak. Megjithatë paraprakisht dyshohet se shkak i krimit ka qenë dhuna e vazhdueshme fizike që 56-vjeçari ushtronte ndaj tij. Pritet që policia të zbardhë më shumë detaje mbi ngjarjen.
Gazetarja e Klan News Anila Sefa ka siguruar disa foto të autorit të krimit, por siç shihen datojnë disa vite më parë:
“Bazuar në provat e siguruara dhe në veprimet e kryera nga specialistët për Hetimin e Krimeve të Rënda në DVP Vlorë, në drejtimin e Prokuorisë, rezultoi se ngjarja nuk ishte aksidentale, por e qëllimshme. Si rezultat i veprimeve të thelluara hetimore, u vu në pranga autori i dyshuar, shtetasi M. G., 23 vjeç, djali i 56-vjeçarit që humbi jetën nga shpërthimi në territorin e jashtëm të banesës së tij. 23-vjeçari dyshohet se për shkak të dhunës së vazhdueshme që babai ka ushtruar ndaj tij, ka vendosur lëndë plasëse në sobën me gaz, në oborrin e banesës, nga shpërthimi i së cilës humbi jetën 56-vjeçari.
Në cilësinë e provës materiale janë sekuestruar: mekanizmi elektrik me të cilin është realizuar shpërthimi, 25 granata dore difensive, 37 kallëpe me lëndë plasëse tritol (me peshë 400 gr. secila), 43 kapsolla detonatore, 5 ndezësa granatash, 1 armë zjari pushkë, 1 celular, 2 thika, 310 fishekë luftarakë, 12 krehra për armë zjarri, 2 radio marrëse-dhënëse, kapuça dhe veshje për mbulimin e fytyrës dhe mjete për punime elektrike me ngjitje. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme”, njofton policia./tvklan.al
