KROACI- Një aksidentit i trefishtë raportohet se ka ndodhur në Kroaci, ku si pasojë një person kahumbur jetën dhe dy të tjerë janë plagosur.
Një autobus pasagjerësh që udhëtonte nga Kosova drejt Gjermanisë, një kamion dhe një makinë janë përplasur me njëra-tjetrën mes Orashacit dhe Trstenit, shkruajnë mediat vendase. Një person nga Dubrovniku që ndodhej në makinë humbi jetën, ndërsa dy të tjerë mbetën të plagosur.
Ndërkohë për aksidentin ka reaguar edhe ministria e Jashtme e Kosovës, ku tha se në autobusin kosovar që u aksidentua në afërsi të Dubrovnikut kanë qenë rreth 30 udhëtarë. Sipas informatave të para, asnjë nga udhëtarët nuk është lënduar dhe s’ka kërkuar ndihmë mjekësore. MPJD thekson se aksidenti ka ndodhur në vendin e quajtur Orashac, në afërsi të Dubrovnikut, sonte rreth orës 18:00.
Njoftimi i plotë i MPJD-së:
Lidhur me aksidentin e autobusit nga Kosova në Kroaci, nga informacionet e deritanishme, të marra nga autoritetet kroate, Ministria e Punëve të Jashtme dhe Diasporës njofton opinionin e gjerë se rreth orës 18:00, një autobus me rreth 30 udhëtarë ka pësuar një aksident në vendin e quajtur Orashac, në afërsi të Dubrovnikut. Sipas informacioneve të deritanishme asnjë nga udhëtarët nuk duket të jetë lënduar dhe as të ketë kërkuar ndihmë mjekësore. Informacionet rreth këtij aksidenti do t’i përditësojmë sapo të kemi të dhëna më të detajuara nga organet kompetente kroate.
