Kreu i nismës “Thurje” Endri Shabani foli në lidhje me koncesionarin e sterilizimit me vlerë afro 100 milion eurosh për të cilën janë arrestuar ish zv/ ministri i Shëndetësisë Klodian Rjepaj dhe biznesmeni Ilir Rrapaj si dhe 6 zyrtarë janë nën hetim në gjendje të lirë.
Në një intervistë, Shabani theksoi se Sali Berisha dhe Ilir Meta, hedhin akuza në media, por ama nuk shkojnë në institucionet përkatëse për të denoncuar. Sipas tij, kjo ndodh pasi ata janë ortakë me palën tjetër.
“Ishte një fitore e rëndësishme e aktivizimit shoqëror. Këtu për 30 vite është folur, nuk kanë munguar akuzat në media. Këta flasin në media por nuk shkojnë në institucione, nuk i kallëzojnë në prokurori. Me pak fjalë nuk i shkaktojnë dëm palës tjetër. Këtu qëndron problemi. Kur e ke seriozisht këtë betejë me korrupsionin, kur e ke seriozisht përpjekjen për të ndërtuar në Shqipëri një shoqëri më të drejtë dhe për të ndryshuar këtë klasë politike, atëherë kjo kërkon hapa të guximshëm dhe hapa konkretë, gjë të cilën nuk e bëjnë njerëzit që janë ortakë, pra njerëzit që janë në një fazë kërcënimi dhe shantazhi. Në këtë pikë, ndjesia është një shenjë optimizmi që gjërat po ndryshojnë”-tha ai.
