Ylli portugez, Cristiano Ronaldo është prezantuar te skuadra saudite, Al Nassr.
“Kjo është një mundësi e madhe, jo vetëm në futboll, për të ndryshuar mentalitetin e gjeneratave të reja. Shumë klube nga Australia, Shtetet e Bashkuara, Portugalia janë përpjekur të nënshkruajnë me mua.
Por, puna ime në Evropë ka mbaruar. Jam krenar që kam nënshkruar për Al Nassr. Është vendimi im, familja ime më ka mbështetur, veçanërisht fëmijët e mi, ne jemi krenarë për këtë.
Njerëzit në Arabinë Saudite më duan. Mirëpritja ishte spektakolare”, ka theksuar Ronaldo.
Ai ka thënë se në këtë vend dëshiron të përçojë vizionin e tij për evoluimin e futbolli.
“Shumë njerëz flasin por nuk dinë asgjë për futbollin. Dua të përcjell një vizion ndryshe të vendit dhe futbollit këtu.
Nuk më intereson se çfarë thonë njerëzit, sot futbolli ka evoluar dhe është shumë konkurrues. Ky nuk është fundi i karrierës sime”, ka shtuar portugezi.
Ai ka thënë se në karrierën e tij ka thyer tashmë të gjitha rekordet në Evropë dhe tani dëshiron ta bëjë një gjë të tillë edhe në Arabinë Saudite.
“Kam ardhur këtu për të fituar. Dua të argëtohemi dhe të buzëqeshim së bashku këtu në Al Nassr. Bota e futbollit është shumë e avancuar, liga këtu është shumë konkurruese dhe jam i lumtur që jam këtu.
Mezi pres të luaj, madje edhe nesër jam i gatshëm nëse trajneri më jep mundësinë”, ka nënvizuar Ronaldo./rtk
