Stresi është gati për të publikuar albumin e tij të tretë. Ai zbuloi detaje sot në një intervistë për “Shije Shtëpie”, ku konfirmoi se data e publikimit është 1 qershor dhe se titulli i albumit është “Archimed”.
Kopertina e albumit do të jetë me një përmbledhje fotografish me momente nga jeta e Stresit, nga fëmijëria e deri sot. Këngëtari ka zbuluar se ka nisur puna edhe për videoklipet e disa këngëve. Por mes 12 këngëve, ai veçon dy të preferuarat e tij.
“Njëra flet për dashurinë, tjetra flet për ndarjen. I kam të dyja anët e medaljes,” -u shpreh ai.
Mirëpo, pas lajmit të mirë, Stresi i çuditi të gjithë kur tha se ka në plan që ta lërë muzikën.
“Unë jam 38 vjeç aktualisht dhe jam duke menduar dita-ditës ta lë, në moshën më të mirë. Të lë muzikën në moshën 40-vjeçare. Për mua nuk është herët. Unë kam që në 2005-ën që merrem me muzikë, gati 20 vjet. Unë jam një djalë që kam kaluar shumë në jetën time me muzikën, por mendoj që të vazhdoj të mendoj për familjen time.”
