Nga Ilir Vata
Kosova dhe Shqipëria janë dy pjesë të pandashme, në të gjitha dimensionet ata janë të njëjta, gjaku, gjuha, kultura, etnia, të gjitha dalë nga e njëjta nënë, atdheu, Kombi shqiptar. Por çfarë i ndan? Politika, është ajo që i ka vënë mes Kosovës dhe Shqipërisë prej kohësh ka një perde akulli, ku njëra palë i bie gozhdës dhe tjetri, patkoit..! Mes dy vendeve është bërë pak, të dy shtete jo vetëm nuk kanë bashkëpunim të ndërsjellët, por kanë dasi në mënyrën sesi palët e trajtojnë çështjen e Kosovës dhe ky konflikt ka lindur mes Ramës dhe Kurtit, dikur miq. Mes dy vendeve janë bërë dhjetëra marrëveshje bashkëpunimi, por nuk është bërë kryesorja, heqja e trau në doganë mes dy vendeve dhe më keq taksa e rrugës së kombit.
Që këtu nis kufizimi, pasi kosovarëve u është venë taks për të ardhur në shtetin amë? Më e rëndësishmja, nuk ka një këshill të përbashkët për sigurinë kombëtare, nuk ka një agjendë mes dy vendeve për të trajtuar gjëra kombëtare sa herë Serbia provokon Kosovën. Nuk ka një përpjekje të Shqipërisë për të luajtur rolin e saj në institucione ndërkombëtare për njohje të Kosovës dhe nuk është shënuar një rast ku Shqipëria ka kontributin e saj në veçanti. Aktualisht, politika shqiptare ka marrëdhënie më të mira me Serbin se sa me Kosovën dhe kjo lë për të dëshiruar, lë hamendësi për qëndrimin politik në lidhje me Veriun e Kosovës.
Albin Kurti e ka shprehur qëndrimin e tij, dhe po vazhdon të përballet me presionin i vetëm, ndonëse ka pas raste që ka këmbëngulur më shumë se duhet duk mos qene fleksibël me partnerët, por ka një qëndrim. Po politika shqiptare çfarë qëndrimi ka? Pse kjo dasi, sepse politikat e dy vendeve nuk kanë një qasje të përbashkët për trajtimin e çështjes kombëtare, dhe kryesisht të Kosovës. Edhe në provokimi e fundit në Kosovë në kanalin e ujësjellësit, Shqipëria mbajti qëndrim nihilist, ndërsa BE/SHBA dënuan aktin dhe kërkuan që autorët të vihen para përgjegjësisë ligjore. Pra, politika e Kosovës dhe e Shqipërisë janë si shinat e trenit, që ndonëse duken si kur bashkohen kur i sheh nga larg në perspektivë, ato nuk takohen në asnjë pikë, prandaj dhe ka ardhur gjithë kjo dasi?!
Edhe mbledhja e dy parlamenteve është sa për t’i hedhur hi syve të opinionit publik, për të mbuluar të vërtetën, dasinë, hendekun mes palëve. Edhe në fjalët që u thanë në mbledhjen e dy kuvendeve, Presidentja e Kosovës Vjosa Osmani i tha qartë shenjat e unifikimit kombëtarë, madje dukshëm dhe qartë. Ajo tha “Shqipëria dhe Kosova nuk janë vetëm dy shtete të pavarura, por janë dy pjesë të pandashme të një kombi të madh, të bashkuar nga një histori e lavdishme dhe një e ardhme e ndritur që po ndërtohet dita-ditës”. Ndërsa Rama, gjeti rasti të hedh kritika nga mënyra sesi Kosova duhet të qaset në dialog me Serbinë, në vend që të gjente gjuhën e përbashkët për një qëndrim kombëtar.
