SPAK shkeli ligjin me pushimin e çështjes hetimore ndaj dy prokurorëve të posaçëm që mbyllën sytë përpara provave për Arben Ahmetajn.
Kallëzimi i gazetarit Adriatik Doçi, ndaj dy prokurorëve të SPAK, Ened Nakuçi dhe Klodian Braho, me akuzën e shpërdorimit të detyrës, fshehjen e provave dhe devijimin e hetimeve u pushua nga kolegu i tyre i SPAK, Alfred Shehu.
Kjo përbën shkelje ligji nga organi më i lartë i drejtësisë, SPAK, që në mënyrë indirekte ka shpëtuar ish-ministrin e Financave, Arben Ahmetajn.
Merr lajme ekskluzive
Doni të informoheni të parët për lajme ekskluzive? Bashkohuni me grupin tonë duke klikuar këtu
Nëse i referohemi Kodit të Procedurës Penale, një prokuror i SPAK nuk mund të shqyrtojë një kallëzim ndaj dy kolegëve të tij, pasi është në konflikt interesi.
Neni 78 i Kodit të Procedurës Penale, thotë se kallëzimi i Doçit duhet të shkonte për kompetencë në prokurorinë e juridiksionit të zakonshëm, konkretisht në Prokurorinë e Tiranës.
Gjithashtu nuk është kompetencë lëndore e SPAK vepra e shpërdorimit të detyrës, pasi Prokurori i SPAK, nuk është subjekt i parashikuar nga neni 75/a të Kodit të Procedurës Penale.
E thënë më thjesht, SPAK ka shkelur ligjin për të mbrojtur dy prokurorët, duke pushuar kallëzimin për devijim hetimesh, për prova të pakontestuara ndaj ish-ministrit të Financave, Arben Ahmetaj.
Tani mbetet në dorë të Gjykatës së Posaçme për Korrupsion dhe Krim të Organizuar, që të shqyrtojë ankimimin e gazetarit Adriatik Doçi.
Prej ditësh, Top Channel ka publikuar dhjetëra fatura hotelesh të paguara nga bosi i inceneratorëve Klodian Zoto, për Arben Ahmetajn, gjatë kohës së dhënies të koncesionit për inceneratorin e Elbasanit.
Në një vend normal, Ahmetaj duhet te jepte dorëheqjen nga politika dhe të merrej i pandehur nga organet e drejtësisë.
Por deri tani, Ahmetaj nuk është thirrur kurrë në Prokurorinë e Posaçme për të dhënë shpjegime. Madje, pak ditë më parë, ai sfidoi organet e drejtësisë duke shkuar për pushimet e Krishtlindjeve në një tjetër hotel të shtrenjtë në Zvicër, ku një natë fjetje niste nga 2000 euro./TCH
