Një shqiptar ka humbur jetën në një aksident tragjik, të regjistruar rreth orës 21:45 të mbrëmjes së djeshme në Salerno të Italisë.
Mediat përtej Adriatikut raportojnë se viktima është shtetasi Albert K. 42-vjeç, i cili është përplasur nga një makinë teksa ndodhej pranë kabinave të pagesave në autostradën A30 Caserta-Salerno, duke shkuar në drejtim të Casertas.
Sipas RTA Live, 42-vjeçari po kalonte autostradën në këmbë kur u godit nga një makinë me targa bullgare dhe nga forca e përplasjes përfundoi fillimisht mbi xhamin e makinës, e më pas mbi ndarësen metalike të rrugës.
Me gjithë ndërhyrjen e menjëhershme të urgjencës, shqiptari nuk mundi t’i mbijetojë plagëve të marra. Ndërkohë, i plagosur mbeti drejtuesi i makinës që e ka përplasur për shkak të thyerjes së xhamit. Policia mbylli një pjesë të autostradës për të rindërtuar dinamikën e saktë të aksidentit dhe për të pastruar rrugën.
Sakaq, bëhet me dije gjithashtu se shqiptari Albert K. ishte i njohur për forcat e rendit pasi kishte precedentë të mëparshëm penalë. Mbrëmjen e djeshme ai kishte kryer një grabitje në një shtëpi në San Valentino Torio, në provincën e Salernos.
Për këtë arsye policia ka ngritur dy hipoteza mbi aksidentin. 42-vjeçari ose po arratisej duke ecur në këmbë nëpër autostradë, ose po shkonte të takonte bashkëpunëtorët në një vend të paracaktuar. Të dyja pistat po hetohen nga policia rrugore e nënseksionit të Nolës.
