Frrok Çupi ka ngritur sot një alarm, duke apeluar institucionet përkatëse shtetërore se tre gazetarëve iu rrezikohet jeta. Analisti i njohur për kritikat e tij të forta, edhe pse të ekzagjëruara shpesh herë, është marrë sot me një status të hoxhës Ahmed Kalaja, i cili dje shprehej i lumtur për ndarjen nga jeta (vetëvrasjen) e analistit dhe gazetarit Kastriot Myftaraj.
Ja reagimi i plotë i Çupit: “Edhe një gazetar tjetër, nga më të njohurit, dje është kërcënuar me vdekje, pak minuta pasi Kastriot Myftaraj humbi jetën tragjikisht. ‘Ej se mos lutet ndonjëri për rahmet, apo na thotë ngushëllime se do pësojë, BLOCK!’, shkruan me një gëzim vrasës hoxha i Tiranës, Ahmet Kalaja.
Kastrioti shkoi, por këtu kanë mbetur ‘të ngjashmit’ e tij. Këtu janë Mustafa Nano, Denis Dyrnjaja, Aleksandër Çipa… Mandatën e një vdekjeje të paralajmëruar Mustafa Nano e mori dje nga hoxha Kalaja. ‘Paralajmërim kam frikë se edhe “Lëpirsi” që merret me Kuranin do të ketë të njëjtin fat”, shkroi hoxha duke nënkupuar Mustafa Nanon. Hoxha shkruan se ‘Lajm i darkës së Arafatit’, quhet kjo.
Cilët do të jenë ‘shelegët’ në tryezën e kësaj Darke, që është një nga netët e uritura të Agjërimit? Nano u paralajmërua, këtë e dimë. Ai ka qenë kritik ndaj besimit, ashtu siç edhe kanë ndriçuar idetë e shumë mendimtarëve që në Mesjetë. Për këtë, marrim vesh se do të paguajë me ‘darkën’ e ferrit.
Pastaj vijnë me radhë autorë të shumtë që duke e konsideruar besimin si ‘të gjallë e në jetë’, e kritikojnë, e analizojnë, i hedhin dritë. Ndoshta muaj ose edhe më se një vit më parë, në këtë vorbull frike u ndodh Denis Dyrnjaja, një gazetar i të ardhmes televizive. Ai bëri kritikë mbi trajtimin e financave të Elvis Naçit – një ortodoks i kthyer në imam, por si shpërblim mori sulme dhe kërcënime për jetën; me mijëra.
Merr lajme ekskluzive
Doni të informoheni të parët për lajme ekskluzive? Bashkohuni me grupin tonë duke klikuar këtu.
Dyshoj se deklarata dje e Elvisit për Kastriotin se ‘kisha ç’kisha me atë, sot e përcjell me nderim’, është një pako ku fshihet një kërcënim për ‘armiqtë’ e besimit. Ne akoma nuk dimë sa dosje me plane hakmarrjeje ‘fetare’ janë depozituar në duar të pasionantëve të verbër.
Unë kam lexuar shumë autorë mes nesh që nuk qëndrojnë si të ‘ngrirë’ para besimit fetar; por reagojnë. Atëherë, edhe këta mund të jenë në listën e ‘darkës së Arafatit’, darka kur lutjet e hoxhallarëve në sheshin e Arafatit plotësohen nga Allahu i Madhëruar?
A mund të jetë në këtë listë edhe vetë Aleksandër Çipa, kryetar i Unionit të Gazetarëve në vend? Aleksandri, me siguri. Aq më tepër që sot do të jetë plot përgjegjësi për t’i dhënë përgjigje fyerjes së gazetarit Myftaraj bash në ditën e vdekjes së tij. E pas kësaj vetë Aleksandri dhe miqtë kanë për detyre të kërkojnë nga shteti dhe makineria e tij që të hetojë mbi krimin e paramenduar të një hoxhe kundër kritikëve të fesë.
Drejtësia ka në dorë sot një dosje të egër ‘fetare’ ku në emër të Allahut kërcënohet jeta e gazetarëve dhe njëkohësisht dhunohet vetë ideja Islame. Në Kuran thuhet “Fto në rrugën e Zotit tënd me urtësi e fjalë të mira…”( Suretu el-En`amë, ajeti3), por hoxha të kundërtën.
Drejtësia ka për detyrë që menjëherë të marrë në hetim hoxhën vrasa- ndjellës. Ndërsa ‘shtëpia’ e gazetarëve sot ka punë të vërtetë; deri dje po kërkonte punë në bulevard”.
Jeto I Lumtur.al
