Mbi një ton kokainë raportohet të jetë sekuestruar të martën në portin e Savona-s nga autoritetet e Barit në Itali. Droga ishte fshehur në një anije dhe u kap në vijim të operacionit të zhvilluar më 2 Janar, ku u arrestuan 4 shqiptarë të cilët u kapën me 3.5 kuintal kokainë.
Merr lajme ekskluzive
Doni të informoheni të parët për lajme ekskluzive? Bashkohuni me grupin tonë duke klikuar këtu
Shqiptarët u kapën në provincën e Savonës. Edhe në atë rast droga kishte mbërritur në portin e këtij qyteti. Pas arrestimit të tyre, Guardia di Finanza kishte mësuar për mbërritjen e një tjetër ngarkese droge me një anije që mbante flamurin e Hong Kong-ut. Mjeti lundrues ishte nisur nga porti i Santos në Brazil, më 30 Dhjetor të vitit që lamë pas. Kjo bëri që autoritetet italiane ta mbanin nën vëzhgim anijen nga deri e ajri. Ata ndërhynë kur anija mbërriti në portin e Savona-s, mëngjesin e së martës.
Kokaina ishte fshehur në një vend të përshtatur në pjesën e motorëve të anijes. Ajo ishte e ndarë në 741 copa, të mbështjella në 26 pako me celofan.
Mediat italiane shkruajnë se nga hetimet u zbulua se bëhet fjalë për një rrjet transnacional të trafikut të kokainës, që operon në Italinë qendrore-jugore me eksponentë kriminalë shqiptarë./tvklan.al
