Kur kanë kaluar 7 ditë nga atentati i Milotit, ku mbeti i vrarë Klisman Preçi dhe u plagos rëndë miku i tij, Ylli Brahimi, i cili ndodhet ende në spital. Agresorët janë kujdesur me përpikmëri, që në këtë krim të linin sa më pak prova që do mund t’i identifikonin.

Sipas gazetarit Elton Qyno, i cili shkruan për “OraNews“, Ylli Brahimi, është tentuar dy herë të merret në pyetje nga Policia dhe nuk ka qenë në gjendje të flasë. Madje në nisjen e dëshmisë për hetuesit e çështjes ai u ka kërkuar që të ndalojnë pasi nuk ka qenë më në gjendje t’u përgjigjet pyetjeve. Megjithatë siguria për të është maksimale, pasi në dhomën e 46-vjeçarit hyjnë vetëm familjarët dhe punonjës të Policisë që janë pjesë e grupit hetimor duke e mbajtur në ruajtje 24 orë nga efektivët.

Ndërkohë që nga vendi i ngjarjes, hetuesit kanë mbledhur gjatë këtyre 7 ditëve për këtë ngjarje kriminale, janë vetëm 108 gëzhoja kallashnikovi, një automjet “Audi” të djegur dhe dy armë të djegura. Ndërsa ditën e krimit, DVR-ja në shtëpinë e Brahimit, që mbante në memorie filmimet nga kamerat e sigurisë, ka qënë e fikur.

Vrasja e 28-vjeçarit Klisman Preçi dhe plagosja e Ylli Brahimit, 46 vjeç tronditi edhe një herë vendin pas masakrës së Fushë Krujës me 3 të vrarë më 17 korrik. Pas ngjarjes, në fshatin Gramës është gjetur një makinë duke u djegur, e cila dyshohet se i përket autorëve të ngjarjes. Brenda në mjet janë gjetur 2 kallashnikovë, ndërsa hetimet kanë nisur për të zbuluar identitetin e autorëve. Që dyshohet se janë 3, por asgjë nuk është e konfirmuar.

Prokuroria e Krujës dhe Kurbinit kanë nisur hetimet, por ende nuk kanë vendosur që të bashkojnë dy dosjet me njëra-tjetrën, edhe pse i ndajnë vetëm pak ditë, e të shkuarat e viktimave janë të ndërthurua bashkë. Megjithatë duket se aksioni për vrasje që ka nisur nuk ka të ndalur, pasi disa ditë më parë në Tiranë u kapën dy persona që lëviznin me snajper. …jetoilumtu.al/  

Burimi lajmifundit.al/