Pasi kanë kaluar filtra pafund për të ushtruar profesionin për të cilin kanë studiuar për pesë vite, kandidatët për mësues duhet të rikthehen sërish në ambientet e Qendrës së Shërbimeve Arsimore.
Këtë herë, jo për licencën, por për t’u futur në provimin, i cili i fut në listë pritjen e gjatë për punësim. Bëhet fjalë për “Mësues për Shqipërinë”, i cili starton javën e ardhshme, në 18 korrik dhe zgjat për thuajse dy muaj.
Merr lajme ekskluzive
Doni të informoheni të parët për lajme ekskluzive? Bashkohuni me grupin tonë duke klikuar këtu
DATAT
Pasi njoftoi kandidatët që kanë marrë “OK” në fazën e parë të konkurrimit, atë me dosje, se do të nisin testimin në korrik, QSHA-ja ka bërë publike këtë të enjte kalendarin me datat e testimit për mijëra mësuesit që testohen për herë të parë ose të dytë dhe që kanë zgjedhur të mos ruajnë pikët e testimit nga viti i kaluar, por të rikonkurrojnë për të fituar më tepër.
Të parët që i nënshtrohen provimit janë mësuesit e Gjuhës Shqipe e Letërsisë, ndër më të shumtët në numër, në raport me profilet e tjera.
Janë 934 mësues që do të provojnë dijet e tyre përgjatë një jave, 18-25 korrik, nga e hëna në të hënë.
Pas tyre janë mësuesit e Matematikës, të Kimisë, Muzikës, Shkencave Sociale, TIK, Arsim Special e kështu me radhë sipas kalendarit me datat në tabelën bashkëngjitur shkrimit.
Për disa profile, QSHA-ja vë në dispozicion katër oraret e mundshme brenda ditës, ndërsa në ato ku ka më pak kandidatë lihet në dispozicion një orar me një ose disa salla testimi paralel.
TESTIMI
Janë gjashtë fusha ku do të bazohet provimi: dokumentacioni zyrtar, ai kurrikular, aspekte të pedagogjisë në mësimdhënie, etikë dhe komunikim, drejtshkrim, si dhe përmbajtja shkencore e lëndës.
Për të gjitha fushat, ekspertët e MAS-it kanë shënuar referencën përkatëse të informacionit. I gjithë testi është i ndarë në dy pjesë: ajo që mbulon standardet e përgjithshme të mësuesit dhe ajo që lidhet specifikisht me lëndën që ka studiuar.
Testimi, ethet e të cilit kanë nisur tanimë, ka peshën kryesore, por jo të gjithën në garën për punësim.
Është dosja profesionale me shkallën e kualifikimit, gjuhët e huaja apo dëshmi të tjera që përmban 20 pikë dhe dorëzohet përpara se kandidati të futet në provim.
Ajo i nënshtrohet një vlerësimi nga komisionet të ngritura në drejtoritë rajonale dhe pikët e tij mblidhen me atë të testimit, që përmban 80 pikë, në rast se mësuesi iu përgjigjet saktë 50 pyetjeve në total.
Përgjigjet e sakta të tyre vlerësohen me 100%, të cilat më tej konvertohen në 80 pikë. Mësuesit që duan të bartin pikët e testimit nga viti i kaluar, QSHA-ja tërheq pikët e testimit dhe bën konvertimin e tyre.
Përpara se t’u vijë data e caktuar, çdo mësues mund të shkarkojë programin orientues në faqen zyrtare të Agjencisë së Sigurimit të Cilësisë në Arsimin Parauniversitar ku gjenden çështjet mbi të cilat do të bazohet teza finale.
Prej tetë vitesh “Mësues për Shqipërinë” ndërmjetëson rekrutimin e mësuesve në shkolla, ndërsa që nga 2018-a është bërë pjesë e ligjit për arsimin parauniversitar. Gjatë kësaj kohe nuk kanë munguar akuza për punësime jashtë këtij sistemi.
RREGULLAT
Duke qenë se kjo nuk do të jetë hera e parë që i nënshtrohen një testimi të tillë pranë QSHA-së që ka të njëjtën natyrë provimi për të gjitha, rregullat dihen.
Ndalimi i çdo lloj komunikim, paraqitja 30 minuta përpara provimit me dokumentet e duhura me vete janë penalizuese në rast se nuk zbatohen.
“Ditën e testimit, kandidati duhet të jetë i pajisur me letërnjoftim, kopje të kartës së ID-së, formularin e pjesëmarrjes në testimin e informatizuar të lëshuar nga Komisioni i Vlerësimit të Dosjeve në DRAP.
Kandidatëve, të cilëve iu mungojnë dokumentet e mësipërme, nuk do të mund të marrin pjesë në testimin e informatizuar”, njofton QSHA-ja, duke iu kujtuar gjithashtu kandidatëve se nuk do të ketë ndryshime orari përtej atij të planifikuar dhe se për çdo pasaktësi t’i drejtohen drejtorisë arsimore përkatëse.
KALENDARI I DATAVE
Gjuhë Shqipe e Letërsi 18.7.2022 – 15.7.2022
Matematikë 15.7.2022 – 27.7.2022
Kimi 28.7.2022
Muzikë 28.7.2022
Muzikë (shkolla artistike) 29.7.2022
Shkenca Sociale 1.8.2022
TIK 1.8.2022
Arsim Special 2.8.2022
Edukim Fizik 3.8.2022 – 5.8.2022
Balet (Shkolla Artistike) 5.8.2022
Gjuhë Angleze 8.8.2022 – 11.8.2022
Gjuhë Frënge 11.8.2022
Gjuhë Italiane 12.8.2022
Arsim Parashkollor 15.8.2022 – 18.8.2022
Art Pamor (shkolla artistike) 18.8.2022
Art Pamor 18.8.2022
Gjuhë Gjermane 18.8.2022
Fizikë 19.8.2022
Arsim Fillor 22.8.2022 – 26.8.2022
Gjuhë Greke 26.8.2022
Histori 29.8.2022 – 31.8.2022
Gjeografi 31.8.2022 – 2.9.2022
Biologji 6.9.2022 – 7.9.2022
23 PROFILE mësuesie do të futen në provimin e radhës pranë Qendrës së Shërbimeve Arsimore. Jo për t’u certifikuar në profesionin për të cilin kanë studiuar për vite me radhë, por për të fituar një vend në listëpritjen e gjatë për një vend pune.../jetoilumtu.al/
burimi lajmifundit.al/
