Komiteti Shqiptar i Helsinkit bën me dije se vëzhguesit e saj janë penguar që të verifikojnë dyshimet mbi vdekjen e Enver Sheshit në dhomat e paraburgimit.
Përmes një deklarate të gjatë, KShH rendit të gjitha sorollatjet, që thotë se u janë bërë vëzhguesve të tij nga institucionet shtetërore. Vëzhguesit janë paraqitur fillimisht në burgun 313, ku mbahej në qeli i ndjeri Enver Sheshi, një nga të akuzuarit për çështjen e inceneratorit të Fierit.
Me pretendimin se çështja po ndiqet nga prokuroria dhe çdo gjë lidhur me këtë çështje e disponon ajo, drejtuesi i burgut nuk pranoi që vëzhguesit e KShH-së të njiheshin me dokumentacionin përkatës të pranimit të të ndjerit.
Komiteti thotë se u shkel marrëveshja e bashkëpunimit që ka me Drejtorinë e Përgjithshme të Burgjeve, ku nuk u pranua që vëzhguesit të merrnin takim me stafin e institucionit dhe as të këqyrnin ambientet në të cilat ishte akomoduar i paraburgosuri.
Vëzhguesit u paraqitën më pas në prokurorinë e Tiranës, pranë së cilës u informuam nga Koordinatorja për të Drejtën e Informimit se nuk kishte asnjë kallëzim të regjistruar për këtë çështje.
Ditën e dytë të verifikimit, vëzhguesit e Helsinkit u paraqitën në 4 institucione të ndryshme të Policisë së Shtetit dhe pas një kalvari të gjatë vizitash dhe përcjellje nga këto autoritete, u arrit të konkretizohej se në Komisariatin nr. 4, Tiranë, Oficeri i Policisë Gjyqësore kishte kryer disa veprime procedurale për këtë ngjarje.
Ai informoi vëzhguesit se ka shkuar në morg dhe ka kryer disa veprime procedurale për fiksimin e provave siç janë ‘procesverbal këqyrjeje kufome; procesverbal për kryerjen e ekspertizës mjeko – ligjore, si dhe të dhënat e marrra nga sistemi TIMS për Enver Sheshin.
Helsinki thotë në deklaratë se oficeri ka shkelur Kodin e Procedurës Penale duke mos informuar prokurorin. Ai pretendon se ka njoftuar prokurorin lidhur me këto veprime, por nuk nuk u vendosi vëzhguesve në dispozicion asnjë informacion konkret, se cili ishte ky prokuror dhe në ç’mënyrë ishte njoftuar me telefon, apo me shkresë.
Procesverbalet përkatëse i janë dërguar Prokurorisë së Tiranës për veprime të mëtejshme procedurale por nuk rezulton të jetë bërë ndonjë kallëzim penal. Kërkesa verbale e grupit të vëzhguesve të KShH për t’u njohur me këtë dokumentacion, nuk u pranua prej oficerit të Policisë Gjyqësore, me arsyetimin se ato i janë përcjellë Prokurorisë.
Fill pas kësaj, vëzhguesit e Helsinkit shkuan për herë të dytë në harkun e 24 orëve, në Prokurorinë e Tiranës. Koordinatorja për të Drejtën e Informimit u shpreh sërish se nuk rezulton të jetë regjistruar çështje lidhur me vdekjen e Enver Sheshit. E pyetur lidhur me njohjen e dokumentacionit të dërguar nga Komisariati nr.4, ajo sqaroi se në prokurori ato ende nuk kanë mbërritur.
Gjithashtu ajo u interesua pranë prokurores së gatshme që mbulon juridiksionin e Komisariatit nr. 4, nëse ishte në dijeni për çështjen e mësipërme dhe informoi vëzhguesit se as prokurorja në fjalë nuk ishte në dijeni për këtë çështje.
Vëzhguesit e Helsinkut u paraqitën edhe pranë dy institucioneve të tjera si QSUT dhe Instituti i Mjekësisë Ligjore. Pranë QSUT, pas një kohe të gjatë pritje, u informua se duhet të bënin një kërkesë për informacion, ndërsa përfaqësuesit e Mjekësisë Ligjore u komunikuan që nuk kishin dalë ende rezultatet e autopsies.
Helsinki deklaron se e gjithë sorollatja bie ndesh me vendimet e Gjykatës së Strasburgut për hetimin e vdekjeve të dyshimta, ku përgjegjësia mund të jetë e institucioneve shtetërore.
Helsinki thotë se ky refuzim krijon dyshimin e arsyeshëm se Enver Sheshit i janë shkelur të drejtat themelore të njeriut. Deklarata mbyllet me thirrjen drejtuar Prokurorisë së Tiranës për të bërë transparencë për ngjarjen./OraNews
